AQSh-ta 24 jastaǵy qazaqstandyq Áset Quralbaidyń joǵalyp ketkenine eki aptaǵa jýyq ýaqyt boldy. Ol jaqyndarymen sońǵy ret 2 maýsym kúni bailanysqa shyqqan. Al 7 maýsymnan beri telefony óshirýli, dep habarlaidy dalanews.kz.
Qazaqstannyń Syrtqy ister ministrligi bul aqparatty rastady. Vedomstvonyń málimetinshe, qazir qazaqstandyq diplomattar oqiǵanyń mán-jaiyn anyqtaý jumystaryn júrgizip jatyr. Niý-Iorktegi Bas konsýldyq ta joǵalǵan azamattyń týystarymen turaqty bailanysta ekenin habarlady.
Týystarynyń aitýynsha, Áset Quralbai úiinen shyǵar kezde barlyq qujattary men ámiianyn qaldyryp ketken. Izdeý jumystary barysynda jergilikti politsiia onyń avtokóligin tapqanymen, jas jigittiń ózi ázirge tabylǵan joq.
Qazirgi ýaqytta onyń qaida ekeni jáne qandai jaǵdaida joǵalyp ketkeni belgisiz.
