Almatynyń Túrksib aýdandyq sotynda Bek Air áýe kompaniiasynyń ushaǵy apatyna qatysty qylmystyq is qaralyp jatyr, dep habarlaidy Dalanews.kz Nur.kz-ke silteme jasap.
Kezekti otyrysta sot-meditsinalyq sarapshy Rahimjan Abdýkarimov óz qorytyndysyn jariialap, qaza bolǵandardy aman alyp qalýǵa múmkindik bolǵanyn málimdedi.
Sarapshynyń aitýynsha, ekipaj músheleri men jolaýshylar alǵan jaraqattardyń barlyǵy ushaqtyń turǵyn úige soǵylý sátinde paida bolǵan.
"Basqa nusqalar joq. Barlyq jaraqat – qozǵalys ústindegi áýe kemesiniń turǵyn úimen soqtyǵysýynan alynǵan soqqynyń saldarynan bolǵan. Aviatsiialyq jaraqat belgileri anyqtalǵan joq", – dedi ol.
Abdýkarimovtyń sózinshe, adamdardyń qaza bolýy men jaraqat alýynyń naqty sebebi – ushaqtyń úimen soqtyǵysýy. Bul tujyrym beinejazbalarmen jáne apatqa júrgizilgen tergeýdiń qorytyndy esebimen rastalǵan.
Sarapshy apat kezinde ushaq biikten qulamaǵanyn, qurylymdyq jarylys pen órttiń bolmaǵanyn atap ótti.
"Qar jamylǵan jolaqpen qozǵalyp kele jatqan áýe kemesi eki qabatty úige soǵyldy. Sol soqtyǵys fiýzeliajdyń synýyna, qysyla jarylýyna ákeldi. Eger ushaq jolynda úi bolmaǵanda, ekipaj ben jolaýshylar arasynda qurbandar bolmas edi", – dedi Abdýkarimov.
Bek Air kompaniiasynyń Fokker-100 ushaǵy 2019 jyldyń 27 jeltoqsanynda Almatydan Astanaǵa ushyp shyqqan soń, áýejai mańynda beton qorshaýǵa soǵylyp, jeke úige soqtyǵysqan bolatyn.
Qaiǵyly oqiǵa saldarynan 13 adam qaza taýyp, shamamen 70 jolaýshy jaralanǵan.
