Aqtóbe oblysynda kógildir otynǵa qosylǵan aýyldar sany 22-ge jetti. Jyl sońyna deiin áli 6 aýylǵa gaz keledi. Bul óńir úshin rekordtyq kórsetkish, dep habarlaidy Dalanews.kz
Áiteke bi aýdanynyń Araltoǵai aýyldyq okrýgine qarasty Ulǵaisyn men Qiiaqty aýylynda gaz qubyry iske qosyldy.
Araltoǵai aýyldyq okrýginiń aýmaǵy 211 myńnan astam gektar, okrýg quramyna 4 eldi meken kiredi. Aýyldyq okrýgte jalpy halyq sany 1649 bolsa, kógildir otyn kirgen Ulǵaisyn aýylyda 63 úi, 374 turǵyn, al Qiiaqtyda 33 úi, 208 turǵyn bar.
Biylǵy jyly aýdan boiynsha kógildir otynǵa 5 aýyl qosylyp, jalpy sany 18-ge jetti, osylaisha 18 myńnan astam turǵyn nemese aýdan halqynyń 87,5%-y kógildir otyndy paidalanyp otyr.
Joba aiasynda «KazPromStroiGrýpp» JShS merdiger kompaniiasy 110 shaqyrymdyq jetkizýshi jáne aýylishilik gaz jelisin saldy.
Gaz júiesin iske qosý saltanatyna aýdan ákimi D.Toǵyzbaev, oblystyq energetika jáne turǵyn-úi kommýnaldyq sharýashylyǵy basqarmasynyń basshysy A.Aitbaev, aýyl aqsaqaldary men turǵyndar qatysyp, tarihi sátke kýá boldy.
Kógildir otynnyń kelýi halyqtyń turmys sapasyn aitarlyqtai jaqsartyp, aýyldyń áleýmettik-ekonomikalyq damýyna serpin beredi.
«Búgin aýylymyz úshin qýanyshty ári tarihi kún dep aitýǵa bolady. Kópten, asyǵa kútken tabiǵi gaz aýylymyzǵa jetti. Buryn kómir jaǵyp, kúl shyǵaryp, otyn daiyndap, áýre bolatynbyz. Endi úiimiz taza, jyly. Bul - árbir otbasy úshin úlken jeńildik», - dep aýyl turǵyny Ziiash Qalieva qýanyshymen bólisti.
