Májilis depýtaty Nartai Sársenǵaliev áleýmettik jeli úshin prank jasaityndardy synady, dep habarlaidy Dalanews.kz.
Depýtat jelide taraǵan birneshe oqiǵaǵa toqtaldy.
"Astanada bloger dostarymen birge lifttiń ishine "jalǵan máiit" kirgizip, keiin jaryqty óshiredi. Sol sátte máiit keipindegi adam qozǵala bastaidy. Jedelsatynyń ishinde bolǵandardyń jan daýsy shyqty. Elordanyń taǵy bir turǵyny jedelsatyǵa tapanshamen kirip, adamdarǵa kezep, jurttyń záre-qutyn aldy. Almatyda blogerler aýla sypyrýshylarǵa qoqys laqtyryp, mazaq etip beinejazba túsirip taratty. Mundai mysal myń", - dedi ol.
Sondai-aq, Nartai Aralbaiuly Qytaida, Ózbekstanda prank túsirgen bloger týraly da aitty.
"Ol ol ma, bizdiń bloger-symaqtar shetelge baryp abyroidy airandai tógip júr. Máselen, qazaqstandyq bloger Arýjan Aibekova Qytaida "urlyq jasap jatqandai" rolik túsirgen. Arty úlken shý bolyp, aqyry álgi qyz jergilikti politsiiaǵa shaqyryldy. Túsindirý jumystary júrgizildi. Biraq ol túsindi me? Óitkeni dál osy bloger arada az ýaqyt ótkende Tashkent metrosynda jigitterdiń qolynan ustap tiiskeni týraly beinejazba taǵy tarady. "Oiynnan da omyrtqa synatynyn" bilmeitin mundai bloger-symaqtardy qatań jaýapqa tartatyn kez keldi. Sebebi bul - adamnyń jeke ómirine qol suǵý, qoǵamdyq tártipti buzý", - dedi ol.
Depýtat keiingi kezde jelide tarap jatqan taǵy bir prankty synady.
"Qazir prank degen paryqsyz árekettiń taǵy bir túri paida boldy. Ol jasandy intellektimen jasalady. Birinde memleket basshylarynyń, laýazymdy tulǵalardyń qandai da bir dúkenge saýda jasaýǵa kelgeni beinelengen. Tsifrlyq tehnologiiany bilmeitin adamnyń sanasy san saqqa júgiredi, senip qalady. Marketing úshin dep jasandy intelekt arqyly mundai jasandylyqqa júginýdi toqtatý kerek. Taǵy bir prankte balalar ata-analaryna "tanymaityn adam úige kelip tur, ne isteimiz?" dep, jasandy intellekt arqyly beimálim adam úige kirip ketken, páterdi aralyp júrgen sýretterin jiberedi. Záresi ushqan ata-ana politsiiaǵa telefon shalady, jumysyn tastap úiine barady. Aqyrynda bul prank dep bala-shaǵa beiqam otyrady. Dál sol ýaqytta politsiia shyn muqtaj adamǵa kómekke barýǵa úlgermei qalýy múmkin, ony internettiń inesine otyrǵandar uqpaidy", - dedi Aralbaiuly.
