Исламның іргетасы – жүректегі иман. Ибн Омардан (Алла оған разы болсын) жеткен сахих хадисте Пайғамбарымыз (оған Алланың салауаты мен сәлемі болсын): «Ислам бес нәрсе үстіне құрылған. Олар – „Лә иләһа илләллаһу уә әннә Мухаммадән расулуллаһи“ сөзі, намаз оқу, зекет беру, қажылыққа бару, Рамазан айында ораза ұстау», – деген (Бұхари, Мүслим).
Бұл бес парыз әрбір мұсылманның Алла Тағалаға деген шынайы сенімін бекітіп, пендені рухани тұрғыда кемелденуге бастайды. Ал барлық құлшылықтың қабыл болуы, ең алдымен, сол шынайы иманға байланысты екені даусыз.
Мұсылман адамның әрбір ғибадатына сауап берілуі үшін ол алдымен Мұхаммед пайғамбардың (оған Алланың салауаты мен сәлемі болсын) Алла тарапынан жеткізген ақиқаттарын жүрекпен қабылдап, содан соң намаз оқып, ораза ұстап, зекет беріп, қолынан келсе, қасиетті Қағбаны зиярат етіп, басқа да ізгі істерді орындауы тиіс.
Иман мен амалдың ұштасуы – пенденің Жаратушы алдындағы жауапкершілігін толық сезінгенін көрсетеді. «Зәлзәлә» сүресінің 7-8-аяттарында: «Ендеше, кімде-кім зәредей жақсылық жасаса, соның қарымын алады. Кімде-кім зәредей жамандық жасаса, соның жазасын тартады», – деп баяндалған. Бұл ақиқат адам баласының қай ісі болмасын марапатсыз немесе жазасыз қалмайтынын білдіреді.
Алла Тағаланың шексіз әділеті жайлы «Әнбия» сүресінің 47-аятында да кеңінен сөз қозғалған: «Қиямет күні сол күнге тән дәл тартатын әділет таразыларын құрамыз да, адамдардың дүниедегі істерін түгелдей тартамыз. Ол күні ешбір жанға титтей де әділетсіздік жасалмайды. Істелген іс қышаның дәнегіндей мысқалдай болса-дағы оны таразыға тартамыз. Біз жауапқа тартушылар ретінде жеткіліктіміз».
Күніне бес уақыт намаз оқу мен Рамазан айында ораза ұстау – Ислам дінінде әрқайсысы жеке-жеке парыз етілген ғибадаттар. Оның бірін орындамау екіншісін жоққа шығармайды.
Мәселен, намаз оқымайтын кісі ораза ұстауы арқылы әйтеуір бір сауабын алуы мүмкін. Алайда намаздың қадір-қасиеті өте жоғары екені де белгілі. Намаз оқу – балиғат жасына жеткен, ақыл иесіне парыз. Қиямет күні ең әуелі сұралатын амал да – осы намаз. Пайғамбарымыз (оған Алланың салауаты мен сәлемі болсын): «Қиямет күні ең алдымен пенде намаз жайында сұралады. Егер намазы дұрыс болса, құтылады әрі ұтады. Егер намазы болмаса, алданады әрі зиянға ұшырайды» (Термизи, Әбу Дәуіт, Нәсаи) деген. Демек, ақыреттегі есеп-қисаптың өзегі – пенденің Раббысына қалай құлшылық қылғанында.
Бұл дүниеде әр адамның алдында Алла Тағала бұйырған парыздарды ықыласпен орындау мүмкіндігі бар. Мұсылманның бойындағы берік сенім – оның ғибадаттарын жандандырып, сауап есіктерін ашады.
Барлық парыз бен сүннет амалдарды орындауға тырысу – әрбіріміздің міндетіміз, әрі жүрегімізде тірі тұрған иманымыздың нышаны.
Алла Тағала бәрімізге намаздың берекетін сезінуді, оразаның сабырын бойымызға дарытуды, зекеттің мейірімін ұқтыруды, қажылықтың рухани жаңғыруын көруді нәсіп еткей. Иманымыз кәміл болса, ғибадатымыз да қабыл болмақ. Ал жақсылық атаулының қайтарымы – Алланың қияметтегі өлшеусіз сыйы.
