Қазақстанда мүмкіндігі шектеулі жандар мемлекеттік әлеуметтік жәрдемақы мөлшерін көтеруді талап етті, деп хабарлайды Dalanews.kz.

"Мүгедектік бойынша мемлекеттік жәрдемақылардың мөлшерін анықтау тетігін қайта қара, атап айтқанда, I топтағы мүгедектігі бар адамдар үшін коэффициентті кемінде 3,5 ең төменгі күнкөріс деңгейіне дейін арттыру. II және III топтар үшін де лайық өмір сүру деңгейін қамтамасыз ету мақсатында коэффициенттерді қайта қарау мүмкіндігін зерделеу. Қазақстан Республикасының Үкіметіне әлеуметтік кодекстің 177-бабына өзгеріс енгізу жөнінде ұсыныс жолдау", – делінген жарияланған өтініште.

Өтініш әлеуметтік желілерде жарияланды. Сондай-ақ Еңбек және халықты әлеуметтік қорғау министрлігіне дейін соттық талап-арыздың әзірленгені айтылған.

Мүгедектігі бар азаматтардың айтуынша, қазіргі жәрдемақы мөлшері лайық өмір сүруге жеткіліксіз; Қазақстан Конституциясына сәйкес келмейді; сондай-ақ Қазақстан ратификациялаған Мүгедектердің құқықтары туралы конвенцияның 28-бабында көзделген әлеуметтік қорғау мен өмір сүрудің жеткілікті деңгейін қамтамасыз етпейді, оның ішінде мүгедектікке байланысты шығындарды өтеуге арналған қажеттіліктерді де қамтымайды. Бұдан бөлек, бағаның нақты деңгейі, инфляция, тамақтану, медициналық қызмет және күтімге кететін шығындар белгіленген жәрдемақының әділдік қағидатына сай еместігін көрсетеді.