قازاقستاندا مۇمكىندىگى شەكتەۋلى جاندار مەملەكەتتىك الەۋمەتتىك جاردەماقى مولشەرىن كوتەرۋدى تالاپ ەتتى، دەپ حابارلايدى Dalanews.kz.

"مۇگەدەكتىك بويىنشا مەملەكەتتىك جاردەماقىلاردىڭ مولشەرىن انىقتاۋ تەتىگىن قايتا قارا، اتاپ ايتقاندا، I توپتاعى مۇگەدەكتىگى بار ادامدار ءۇشىن كوەففيسيەنتتى كەمىندە 3،5 ەڭ تومەنگى كۇنكورىس دەڭگەيىنە دەيىن ارتتىرۋ. II جانە III توپتار ءۇشىن دە لايىق ءومىر ءسۇرۋ دەڭگەيىن قامتاماسىز ەتۋ ماقساتىندا كوەففيسيەنتتەردى قايتا قاراۋ مۇمكىندىگىن زەردەلەۋ. قازاقستان رەسپۋبليكاسىنىڭ ۇكىمەتىنە الەۋمەتتىك كودەكستىڭ 177-بابىنا وزگەرىس ەنگىزۋ جونىندە ۇسىنىس جولداۋ"، – دەلىنگەن جاريالانعان وتىنىشتە.

ءوتىنىش الەۋمەتتىك جەلىلەردە جاريالاندى. سونداي-اق ەڭبەك جانە حالىقتى الەۋمەتتىك قورعاۋ مينيسترلىگىنە دەيىن سوتتىق تالاپ-ارىزدىڭ ازىرلەنگەنى ايتىلعان.

مۇگەدەكتىگى بار ازاماتتاردىڭ ايتۋىنشا، قازىرگى جاردەماقى مولشەرى لايىق ءومىر سۇرۋگە جەتكىلىكسىز؛ قازاقستان كونستيتۋسياسىنا سايكەس كەلمەيدى؛ سونداي-اق قازاقستان راتيفيكاسيالاعان مۇگەدەكتەردىڭ قۇقىقتارى تۋرالى كونۆەنسيانىڭ 28-بابىندا كوزدەلگەن الەۋمەتتىك قورعاۋ مەن ءومىر ءسۇرۋدىڭ جەتكىلىكتى دەڭگەيىن قامتاماسىز ەتپەيدى، ونىڭ ىشىندە مۇگەدەكتىككە بايلانىستى شىعىنداردى وتەۋگە ارنالعان قاجەتتىلىكتەردى دە قامتىمايدى. بۇدان بولەك، باعانىڭ ناقتى دەڭگەيى، ينفلياسيا، تاماقتانۋ، مەديسينالىق قىزمەت جانە كۇتىمگە كەتەتىن شىعىندار بەلگىلەنگەن جاردەماقىنىڭ ادىلدىك قاعيداتىنا ساي ەمەستىگىن كورسەتەدى.