رەداكسيادان: ءال-فارابي اتىنداعى قازاق ۇلتتىق ۋنيۆەرسيتەتىنىڭ
رەكتورى عالىمقايىر مۇتانوۆتىڭ جۇرگىزىپ وتىرعان ساياساتىنا كوڭىل تولماستىق بىلدىرگەن حات كەلىپتى. حات اۆتورى نۇعىمان ارالباي «ۇلتتىق ۋنيۆەرسيتەتتەگى قازاقتىڭ بوتانيكالىق عىلىمي مەكتەبىنىڭ وتى وشپەسە ەكەن...» دەيدى. اشىق حاتتىڭ تولىق نۇسقاسىن نازارلارىڭىزعا ۇسىنىپ وتىرمىز. الداعى ۋاقىتتا اتالمىش ۋنيۆەرسيتەتتەگى وسى جانە باسقادا ماسەلەلەر تۋرالى ارنايى جۋرناليستىك زەرتتەۋ جۇرگىزەتىن بولامىز.
اشىق حات
قۇرمەتتى عالىمقايىر مۇتان ۇلى!
اڭگىمەنىڭ باسىن اشىپ الاتىن بولساق، مەن ءسىز جۇرگىزىپ وتىرعان رەفورمالاردى تۇسىنە المايمىن. سوندىقتان دا ءوز باسىم ءسىزدىڭ باستامالارىڭىزعا قولداۋ كورسەتۋدى ءجون سانامايمىن.
اسىرەسە، ءوزىم اينالىساتىن بوتانيكا عىلىمىنا قاجەتتى كادرلار دايىندايتىن بوتانيكا كافەدراسىنىڭ جويىلىپ كەتكەنىنە قىنجىلاتىنىمدى جاسىرا المايمىن.
ءيا، راس بيوالۋانتۇرلىلىك پەن بيورەسۋرستار كافەدراسىندا «گەوبوتانيكا» ماماندىعى بويىنشا ماماندار دايىندالادى ەكەن دەپ ەستىپ، ىشتەي «بۇعان دا ءتاۋبا» دەپ جۇرگەنمىن.
وسىدان ءبىر جىل بۇرىن مەنى ماگيسترانت-گەوبوتانيكتەرمەن كەزدەسۋگە شاقىرعان بولاتىن. اڭگىمەلەسكەندە، وقىپ جۇرگەن «گەوبوتانيك-ماگيسترانتتاردىڭ» باسىم بولىگىنە كوڭىلىم تولمادى. سويتسەم، ولاردىڭ كوپشىلىگى بوتانيكانىڭ «الىپپەسىن» ەندى اشىپ ءجۇر ەكەن. كەيىن مۇنى وزدەرى دە مويىندادى، سەبەبى ولار باكالاۆرياتتى باسقا ماماندىقتار بويىنشا – بيوتەحنولوگيا، بالىق شارۋاشىلىعى جانە تاعى باسقا سالالار بويىنشا ءبىتىرىپتى. ال باكالاۆرياتتا «گەوبوتانيكا» ماماندىعى اتىمەن جوق ەكەن.
ودان بەرى دە ءبىراز ۋاقىت ءوتتى. ءسىزدىڭ باسقارۋىڭىزداعى ۋنيۆەرسيتەتتە باكالاۆرياتتا «گەوبوتانيكا» ماماندىعى ءالى دە جوق. سونىمەن، «گەوبوتانيكا» ماماندىعى بويىنشا كادرلار دايىنداۋدا ءبىرتۇتاستىق قامتاماسىز ەتىلمەيدى.
مەنىڭ ويىمشا، فاكۋلتەت باسشىلىعى مەن كافەدرا جەتەكشىلەرى ماسەلەنى تەرەڭ تۇسىنبەي، بىلىكتىلىكپەن قاراستىرا الماي وتىرعان سىڭايلى.
وسىمدىك دۇنيەسى – بارلىق تىرشىلىكتىڭ كوزى. ال وسىمدىكتەر قاۋىمداستىعىن زەرتتەيتىن «گەوبوتانيكا» – بوتانيكا عىلىمىنىڭ ەڭ بيىك شىڭى.
ەلباسىمىز – پرەزيدەنت ن.ءا. نازاربايەۆ مىندەتتەپ وتىرعان زاماناۋي پروبلەمالار – جاسىل ەكونوميكا، جاسىل ەنەرگەتيكا، بيولوگيالىق قاۋىپسىزدىك، ازىق-تۇلىكتىك قاۋىپسىزدىك جانە اۋىل شارۋاشىلىعى، مەديسينا ماسەلەلەرىن بوتانيكالىق ىرگەلى عىلىمسىز شەشۋ مۇمكىن ەمەس ەكەنى بەلگىلى جايت. ال ىرگەلى عىلىممەن اينالىساتىن پروفەسسيونالدى ءبىرتۇتاس، كەشەندى جۇيەدە دايىنداۋ كەرەكتىگىن ءسىز جوققا شىعارماسسىز دەپ ۇمىتتەنەمىن.
نۇعىمان ارالباي، بيولوگيا عىلىمدارىنىڭ دوكتورى، پروفەسسور
اۆتور تۋرالى:
نۇعىمان ارالباي – قازۇۋ-دىڭ تۇلەگى. 150-دەن استام عىلىمي جۇمىستىڭ، ونىڭ ىشىندە بىرنەشە مونوگرافيانىڭ اۆتورى.
