Eriktilersiz is bitpeitin boldy
Arystaǵy jarylys, ótken jylǵy qurǵaqshylyq, kúni keshegi Qostanai oblysynda oryn alǵan órt kezinde de eriktiler túrli gýmanitarlyq kómekti uiymdastyryp, qarapaiym halyqtyń tyǵyryqtan shyǵýyna barynsha septesti.
Jalpy, qiyndyqty birlesip eńserý qazaq halqynyń saltynda bar dúnie. Ata-babalarymyz ony «asar» dep ataǵan. Bir adam qandai da bir qiyn jaǵdaiǵa tap bolsa kópshilik asarlatyp, álgi adamnyń máselesin sheship berip, eshkimdi qiyndyqpen betpe-bet qaldyrmaǵan. Asarlatyp is bitirýdi aýyldy jerlerde áli kúnge deiin qoldanady. Sondyqtan qazaq qoǵamy úshin volonterlik qyzmet jat emes.
Zaman kóshi alǵa ozǵan saiyn dástúrimizge sińgen keibir ister umytylyp, keide basqasha sipat alatyny anyq. Sol siiaqty qazaqy dástúrdegi asarlatyp isi bitirý zaman talabyna sai damyp keledi.
2021 jyly elimizdiń «Volonterlik qyzmet týraly» Zańyna birqatar ózgerister enip, elimizde volonterlik qyzmettiń jandanýyna yqpal etti. Qazirgi tańda elimizdegi eriktilerdiń jumysyn Volonterlerdiń respýblikalyq front-ofisi rettep otyr. Elimizdiń 17 aimaǵynda osy front-ofistiń bólimsheleri eriktilerdiń jumysyn úilestirýde.
Búginde Volonterlerdiń respýblikalyq front-ofisine elimiz boiynsha 47 myń erikti tirkelgen. Sonymen qatar volonterlik qyzmetpen ainalysatyn 3,2 myń qoǵamdyq uiym bar. Kúni búginge deiin olar qoǵamdy izgilikke bastaityn myńnan astam jobany júzege asyryp, el damýyna óz úlesterin qosyp keledi.
Eriktilerdiń ómirin saqtandyrý mańyzdy
Respýblikalyq volonterler front-ofis jobasynyń jetekshisi, «Ulttyq volonterlik jeli» ZTB atqarýshy direktory Tatiana Mironiýk sońǵy jyldary elimizde ǵalamtor men áleýmettik jeliler keń taralǵannan keiin keibireýler eriktilerdiń atyn jamylyp, alaiaqtyqqa barǵannan keiin máseleniń oń-terisin ashyp berý úshin «Volonterlik qyzmet týraly» zańǵa birqatar ózgerister men tolyqtyrýlar engizilip, elimiz boiynsha eriktilerdiń jumysy júielengenin alǵa tartty.
– Elimizde qandai da bir tótenshe jaǵdailar oryn alǵan kezde álgi jerde sala mamandarymen birge eriktilerdiń qatar júretini belgili. Osylaisha, jan-jaqtan jinalǵan eriktiler tótenshe jaǵdaidyń saldaryn joiýǵa óz úlesterin qosyp keledi. Aitalyq, ormandy jerlerdi órt bolǵanda nemese adamdar ushty-kúili joǵalǵanda halyq eriktilerdiń qyzmetine júginedi. Mundai sátterde eriktiler de aianyp qalǵan emes. Olar bar jumysyn jiyp qoiyp, qaiyrymdylyq ispen ainalysatynyn bilesizder. Olardyń ómiri men densaýlyǵyna qaýip tónetin jaǵdailar da bolýy múmkin. Osy jaittardy nazarǵa alsańyz, eriktilerdiń ómirin saqtandyrýdyń mańyzy zor ekenin túsinesiz. Bizder osy máselemen ainalysqanda bul is bir ǵana «Volonterlik qyzmet týraly» zańǵa ózgerister engizýmen sheshilmeitinine kózimiz jetti. Atalǵan máseleniń túiinin tarqatý úshin birneshe zańǵa ózgerister men tolyqtyrýlar engizilýi kerek eken, – deidi elimiz boiynsha eriktilerdiń jetekshisi Tatiana Mironiýk.
Bireýler úshin volonterlik qyzmet erikkenniń ermegi siiaqty kórinýi múmkin. Shyndyǵynda, olai emes. Qandai da bir iske bel býyp kirisip ketý ekiniń biriniń qolynan kele bermeidi. Mundaida eriktilerdiń ómirin saqtandyrýdyń mańyzy zor. «Volonterlik qyzmet týraly» zańda eriktilerdiń isin saqtandyrý qarastyrylmaǵan.
Bizdiń qoǵam eriktilerdiń jumysyn eńbek dep qabyldaýdy úirenýi kerek. Sol kezde qoǵamda eriktilerge degen qurmet arta túsetini anyq. Tatiana Mironiýk hanym aitqandai, eriktilerdiń ómirin saqtandyrý máselesin bir jaqty retteý úshin bir zańmen bir zańnyń arasyna bailanys ornatý kerek.
Eńbek barysyndaǵy adamnyń ómiri men densaýlyǵyn qorǵaýǵa qatysty másele «Eńbek kodeksinde» ǵana qarastyrylǵan. Ol jerde de jumys berýshi azamat jumys barysynda japa shekse, materialdyq jaýapkershilik júkteletini aitylǵan.
Sondyqtan Respýblikalyq volonterler front-ofisi belsendileri eriktilerdiń volonterlik qyzmet densaýlyǵyna qaýip tóngende onyń esesin qaitarýǵa áleýmettik kepildik berilýi kerek ekenin aitýda. Biz de óz tarapymyzdan bul máseleni qoldaimyz. Eger bizder volonterlik qyzmetke qatysty qandai da bir áleýmettik mindettemelerdi zańǵa engizsek, elimizde eriktilerdiń jumysy jandana túsetini sózsiz.
Belsendi chattar aýyldyń túleýine túrtki boldy
Volonterlik qyzmet kópshilikti ortaq maqsatqa uiystyratynmen erekshelenedi. Sondyqtan aýyl-aýdanda volonterlik qyzmetti damytyp júrgen azamattarǵa qandai da bir jeńildikterdi usynatyn kez kelgeni anyq. Ádette volonterlik ispen jastar ainalysatyny belgili. Qaiyrymdylyq is-sharalaryna belsene qatysyp, tanylǵan jastarǵa oqýǵa túskende jáne jumysqa turǵanda jeńildik pen artyqshylyqtardy berý kerek.
Sońǵy ýaqyttary áleýmettik jeli de volonterlik qyzmettiń jandanýyna serpin bergenin moiyndaýymyz kerek. Qazirgi tańda ár aýyldyń azamattary vatsap jelisindegi toptarǵa birikken. Osy chattarǵa jinalǵan aýylda, týǵan jerinen tysqary júrgen azamattar aýyl deńgeiindegi qaiyrymdylyq isterge belsene qatysyp, aýyldaryn kórkeitýge atsalysýda.
Búginde bizder vatsaptaǵy chattar aýyldy jerlerde volonterlik qyzmettiń keń qanat jaiýyna yqpal etip otyrǵanyna asa mán bermeimiz. Qazir qai aýylǵa barsańyz, aýyldan shyqqan jomart jandar chatta kóterilgen máselelerge qulaq asyp, ózderiniń týǵan aýyldarynda sport alańdaryn, kire beristegi aýyldyń belgilerin turǵyzǵany jaiyndaǵy áńgimelerdi jii estitin boldyq. Osylaisha, áleýmettik jeli aýyldas adamdardy ortaq maqsatqa jumyldyryp, aýyldardyń kórkeiýine yqpal etip otyr.
Osyndai jaittardy nazarǵa alatyn bolsaq, elimizde damyp jatqan volonterlik qyzmet jańa kezeńge aiaq basyp, eldiń aýyz birligin nyǵaityp, qoǵamdyq mańyzy zor ortaq isterge jumyldyryp otyrǵanyn baiqaýǵa bolady.
