Almaty qalasy Naýryzbaı aýdanyndaǵy Nazarbaev Zıatkerlik mektebiniń 100 oqýshysy 25 qazan – Respýblıka kúni merekesine oraı dástúrli «Uly dala muragerleri» atty dombyrashylar fleshmobyn uıymdastyrdy.

Almaty qalasynyń iri oıyn-saýyq jáne saýda ortalyǵynda ótken sharada bir mezette júz dombyrashynyń oryndaýyndaǵy kúmbirlegen kúı áýeni jınalǵan jurtshylyqtyń erekshe yqylasyna bólendi. Dombyra úni men halyqqa keńinen tanys kúıler tyńdaýshylarǵa ulttyq rýh pen merekelik kóńil-kúı syılady.

Jas oryndaýshylar Nurǵısa Tilendıevtiń «Ata tolǵaýy», “Álqıssa”, Qurmanǵazynyń «Kishkentaı», Ábdimomyn Jildebaevtyń «Erke sylqym» shyǵarmalaryn asa sheberlikpen , úıláesimdikpen oryndap, kórermenderge rýhanı lázzat syılady. Sonymen qatar myń buralǵan bıshiler qazaq bıin bılep, jas ánshiler patrıottyq ánderdi oryndady, oqýshylar Abaıdyń baǵa jetpes murasynan óleńder oqydy.

Nazarbaev Zıatkerlik mektebiniń bul dástúrli merekelik sharasy ulttyq mádenı murany dáripteýdi, el tarıhyna degen qurmet pen jas urpaq boıynda otansúıgishtik sezimin arttyrýdy maqsat etedi.