Almaty Polısıa departamenti málimetinshe, joldaǵy jaǵdaıdy turaqtandyrý jáne quqyqbuzýshylyqtyń aldyn alý maqsatynda saptyq bólimsheler reıd júrgizip jatyr, dep habarlaıdy Dalanews.kz.

Úsh táýlik ishinde qalada jol qozǵalysy erejesin buzýdyń 5 myńnan asa deregi anyqtalǵan.

"Mas kúıde kólik basqarǵan 43 júrgizýshi ustalyp, olar kólik júrgizý quqyǵynan aıyryldy. Sonymen qatar, 369 adam kólikti tıisti qujattarsyz tizgindegeni belgili boldy. 94 kólik arnaıy aıyp turaǵyna qoıyldy", - dedi polısıa.

Polısıa qyzmetkerleri túngi jarystardy anyqtap, olardyń jolyn kesken. Budan bólek, jyldamdyqty shamadan tys arttyrýdyń 2 myńnan asa deregi tirkelgen.

Vedomstvo aqparatyna súıensek, keıbir júrgizýshiler óz áreketin ádeıi vıdeoǵa túsirip, áleýmettik jelilerde jarıalaıdy. Polısıa mundaı adamdar anyqtalyp, zań aıasynda jaýapkershilikke tartylatynyn málimdedi.

Eske salaıyq, qaıǵyly oqıǵa 21 naýryzda Almatydaǵy ál-Farabı dańǵylynda boldy.