Májilis depýtaty Aidos Sarym referendýmnan keiingi qoǵamdyq-saiasi ahýalǵa baǵa berip, áleýmettik jelidegi belsendilik qoǵamnyń shynaiy kelbetin tolyq kórsete bermeitinin aitty, dep habarlaidy Dalanews.kz Hronika.kz-ke silteme jasap.
Aitýynsha, jańa Konstitýtsiia jobasyn túsindirý naýqany kezinde ózi bul jumysqa belsene aralasqan. Depýtat bir ai ishinde neshe suhbat bergenin naqty sanamaǵanyn, alaida bul protseske barynsha den qoiǵanyn jetkizdi.
"Ýáde etkendei, iske qosyldym. Segiz óńirde boldym, kóptegen kezdesýge qatystym", – dedi Aidos Sarym.
Depýtat qujattyń mazmunyna senetinin, óitkeni oǵan byltyr kúzden beri tikelei atsalysqanyn atap ótti.
"Biz uialmai usynatyn sapaly qujat jasadyq. Sondyqtan mundai qujatty kez kelgen alańda qorǵaý ońai", – dedi ol.
Suhbat barysynda depýtat bilikke qarsy toptardyń basty qateligi retinde saiasi úderiske aralaspai, syrttan synaýmen shekteletinin alǵa tartty. Onyń paiymynsha, saiasatta sýbekt bolýdyń birden-bir joly - sheshim qabyldaý tetikterine qatysý. Al únemi syrtta qalyp, tek narazylyqpen shektelý túptiń túbinde tuiyqqa tireidi.
Depýtat áleýmettik jelidegi belsendilik týraly da ótkir pikir aitty. Onyń sózinshe, jelidegi daýryqpa pikirler naqty qoǵamdyq salmaqpen árdaiym qabysa bermeidi.
"Áleýmettik jeli – qoǵamnyń marginal, iaǵni shetkeri jáne saiasi turǵydan pármeni álsiz bóligi", – dedi Aidos Sarym.
Sondyqtan ol ondaǵy pikirler shynaiy qoǵamdyq qoldaýmen árdaiym ólshene bermeitinin jetkizdi.
Sondai-aq depýtat saiasattanýshy Dosym Sátbaev týraly da pikir aityp, onyń áldeqashan sarapshylyq alańnan shyǵyp, ashyq saiasatqa keletin ýaqyty jetkenin meńzedi.
"Dosym Sátbaev áldeqashan jaily aimaǵynan shyǵyp, saiasatker bolatyn ýaqyty keldi. Ol saiasattyń ishinde júrip, sarapshylyqtyń tasasyna tyǵylyp otyr", - dep qosty ol.
Sarymnyń sózinshe, keibir saraptamalyq tujyrymdardyń ózinde saiasi ustanymy anyq baiqalady, sondyqtan mundai jaǵdaida beitarap baqylaýshy keipinde qalý qisynsyz.
Budan bólek, ol Qazaqstanda demokratiia batystyq klassikalyq úlgimen emes, eldiń óz saiasi shyndyǵyna sai qalyptasatynyn aitty. Onyń pikirinshe, elde jariia saiasat, azamattardyń naqty qatysýy jáne tsifrlyq tetikterge súiengen ózindik saiasi model ornyǵýy múmkin.
"Belgiiadaǵy ne Italiiadaǵydai demokratiia bizde bolmaidy. Biz óz jolymyzdy salamyz", – dedi ol.
Suhbat sońynda Aidos Sarym bilikke balama bolatyn saiasi kúshke qoǵamda suranys bar ekenin de jasyrmady. Alaida mundai kúshtiń qalyptasýy úshin tek uran emes, júieli jumys, naqty platforma jáne saiasi protseske shynaiy aralasý qajet ekenin atap ótti.
