Parlament palatalarynyń búgingi birlesken otyrysynda «Qazaqstan Respýblikasynyń Quryltaiy jáne onyń depýtattarynyń mártebesi týraly» Konstitýtsiialyq zań jobasy tanystyryldy, dep habarlaidy dalanews.kz.
Zań jobasyn Májilis depýtaty Aidos Sarym baiandady. Onyń aitýynsha, qujat jańa Konstitýtsiia normalaryn iske asyrý maqsatynda depýtattardyń bastamasymen ázirlengen. Zań jobasynyń basty maqsaty bir palataly Quryltaidyń konstitýtsiialyq-quqyqtyq negizin qalyptastyrý bolyp tabylady.
Depýtat óz baiandamasynda Quryltai uǵymynyń tarihi mańyzyna toqtalyp, qazaq tarihynda bul institýt halyq biliginiń bastaýy bolǵanyn aitty. Onyń sózinshe, el taǵdyryna qatysty mańyzdy sheshimder Quryltaida qabyldanǵan.
«Baǵzy zamandardan beri Quryltai halyq biliginiń bastaýy jáne qarapaiym adamdardyń memlekettik sheshimder qabyldaýǵa tikelei qatysýyna múmkindik beretin keleli de kieli jiyn boldy», - dedi Sarym.
Sonymen birge ol Qazaq handyǵy kezeńindegi «Qasym hannyń qasqa joly», «Esim hannyń eski joly» jáne «Jeti jarǵy» sekildi mańyzdy quqyqtyq qujattar dál osy Quryltaida talqylanǵanyn atap ótti. Depýtat qazirgi Quryltai tarihi quryltaidyń kóshirmesi bolmaitynyn aityp, onyń jańa zamanaýi zań shyǵarýshy organ retinde jumys isteitinin jetkizdi.
Zań jobasyna sáikes, Quryltai 145 depýtattan turady jáne olar proportsionaldy júie arqyly bes jyl merzimge sailanady. Aidos Sarym álemde bir palataly parlament júiesine kóshý tendentsiiasy bar ekenin aityp, mundai model zań shyǵarý protsesin jeńildetetinin málimdedi. Onyń aitýynsha, zań jobalary bir jerde qaralatyndyqtan, jaýapkershilik te naqty bolady.
«Bul saiasi protsesti qoǵam úshin neǵurlym túsinikti etip, Quryltaidyń jeke jáne partiialyq jaýapkershiligin kúsheitedi», - dedi depýtat.
Qujatta Quryltaidyń memlekettik bilik júiesindegi orny, qurylymy, ókilettikteri jáne Úkimetpen ózara is-qimyl tetikteri qarastyrylǵan. Sonymen qatar depýtattardyń mártebesi, quqyqtary men mindetteri, parlamenttik kópshilik pen oppozitsiia máseleleri de qamtylǵan.
Depýtattyń aitýynsha, Quryltai Qazaqstan Parlamentiniń quqyqtyq mirasqory bolady. Eger zań qabyldansa, ol 2026 jyldyń 1 shildesinen bastap kúshine enedi. Osydan keiin qazirgi Parlament týraly jáne onyń komitetteri men komissiialary týraly zańdardyń kúshi joiylady.
