ءماجىلىس دەپۋتاتى ايدوس سارىم رەفەرەندۋمنان كەيىنگى قوعامدىق-ساياسي احۋالعا باعا بەرىپ، الەۋمەتتىك جەلىدەگى بەلسەندىلىك قوعامنىڭ شىنايى كەلبەتىن تولىق كورسەتە بەرمەيتىنىن ايتتى، دەپ حابارلايدى Dalanews.kz Hronika.kz-كە سىلتەمە جاساپ.
ايتۋىنشا، جاڭا كونستيتۋسيا جوباسىن ءتۇسىندىرۋ ناۋقانى كەزىندە ءوزى بۇل جۇمىسقا بەلسەنە ارالاسقان. دەپۋتات ءبىر اي ىشىندە نەشە سۇحبات بەرگەنىن ناقتى ساناماعانىن، الايدا بۇل پروسەسكە بارىنشا دەن قويعانىن جەتكىزدى.
"ۋادە ەتكەندەي، ىسكە قوسىلدىم. سەگىز وڭىردە بولدىم، كوپتەگەن كەزدەسۋگە قاتىستىم"، – دەدى ايدوس سارىم.
دەپۋتات قۇجاتتىڭ مازمۇنىنا سەنەتىنىن، ويتكەنى وعان بىلتىر كۇزدەن بەرى تىكەلەي اتسالىسقانىن اتاپ ءوتتى.
"ءبىز ۇيالماي ۇسىناتىن ساپالى قۇجات جاسادىق. سوندىقتان مۇنداي قۇجاتتى كەز كەلگەن الاڭدا قورعاۋ وڭاي"، – دەدى ول.
سۇحبات بارىسىندا دەپۋتات بيلىككە قارسى توپتاردىڭ باستى قاتەلىگى رەتىندە ساياسي ۇدەرىسكە ارالاسپاي، سىرتتان سىناۋمەن شەكتەلەتىنىن العا تارتتى. ونىڭ پايىمىنشا، ساياساتتا سۋبەكت بولۋدىڭ بىردەن-بىر جولى - شەشىم قابىلداۋ تەتىكتەرىنە قاتىسۋ. ال ۇنەمى سىرتتا قالىپ، تەك نارازىلىقپەن شەكتەلۋ ءتۇپتىڭ تۇبىندە تۇيىققا تىرەيدى.
دەپۋتات الەۋمەتتىك جەلىدەگى بەلسەندىلىك تۋرالى دا وتكىر پىكىر ايتتى. ونىڭ سوزىنشە، جەلىدەگى داۋرىقپا پىكىرلەر ناقتى قوعامدىق سالماقپەن ءاردايىم قابىسا بەرمەيدى.
"الەۋمەتتىك جەلى – قوعامنىڭ مارگينال، ياعني شەتكەرى جانە ساياسي تۇرعىدان پارمەنى ءالسىز بولىگى"، – دەدى ايدوس سارىم.
سوندىقتان ول ونداعى پىكىرلەر شىنايى قوعامدىق قولداۋمەن ءاردايىم ولشەنە بەرمەيتىنىن جەتكىزدى.
سونداي-اق دەپۋتات ساياساتتانۋشى دوسىم ساتبايەۆ تۋرالى دا پىكىر ايتىپ، ونىڭ الدەقاشان ساراپشىلىق الاڭنان شىعىپ، اشىق ساياساتقا كەلەتىن ۋاقىتى جەتكەنىن مەڭزەدى.
"دوسىم ساتبايەۆ الدەقاشان جايلى ايماعىنان شىعىپ، ساياساتكەر بولاتىن ۋاقىتى كەلدى. ول ساياساتتىڭ ىشىندە ءجۇرىپ، ساراپشىلىقتىڭ تاساسىنا تىعىلىپ وتىر"، - دەپ قوستى ول.
سارىمنىڭ سوزىنشە، كەيبىر ساراپتامالىق تۇجىرىمداردىڭ وزىندە ساياسي ۇستانىمى انىق بايقالادى، سوندىقتان مۇنداي جاعدايدا بەيتاراپ باقىلاۋشى كەيپىندە قالۋ قيسىنسىز.
بۇدان بولەك، ول قازاقستاندا دەموكراتيا باتىستىق كلاسسيكالىق ۇلگىمەن ەمەس، ەلدىڭ ءوز ساياسي شىندىعىنا ساي قالىپتاساتىنىن ايتتى. ونىڭ پىكىرىنشە، ەلدە جاريا ساياسات، ازاماتتاردىڭ ناقتى قاتىسۋى جانە سيفرلىق تەتىكتەرگە سۇيەنگەن وزىندىك ساياسي مودەل ورنىعۋى مۇمكىن.
"بەلگياداعى نە يتالياداعىداي دەموكراتيا بىزدە بولمايدى. ءبىز ءوز جولىمىزدى سالامىز"، – دەدى ول.
سۇحبات سوڭىندا ايدوس سارىم بيلىككە بالاما بولاتىن ساياسي كۇشكە قوعامدا سۇرانىس بار ەكەنىن دە جاسىرمادى. الايدا مۇنداي كۇشتىڭ قالىپتاسۋى ءۇشىن تەك ۇران ەمەس، جۇيەلى جۇمىس، ناقتى پلاتفورما جانە ساياسي پروسەسكە شىنايى ارالاسۋ قاجەت ەكەنىن اتاپ ءوتتى.
