Qazaqstandaǵy iri dúkender jelileriniń biri qazaq tilindegi jarnamasynda óreskel qatelikter jiberip, áleýmettik jelide synǵa ushyrady, dep habarlaidy Dala News.
Daýdyń bastalýyna blogerdiń jazbasy sebep boldy. Ol iri brendtiń Naýryzǵa arnalǵan jarnamasyn mysalǵa keltirip, mátindegi tildik qatelerge nazar aýdarǵan.
Avtordyń aitýynsha, qazaq tili – jai ǵana «galochka úshin» qoldanylatyn qural emes, ol mádeniet pen aýditoriiaǵa degen qurmettiń kórinisi.
«Qazaq tili – bul jai ǵana lokalizatsiia emes. Bul – qurmet. Al mátinde óreskel qateler bolsa, ol nemquraidylyqty kórsetedi», – dep jazdy ol.
Paidalanýshylar ásirese jarnamadaǵy qarapaiym sózderdiń ózinde qate ketkenine nazar aýdarǵan. Bul jaǵdai kópshiliktiń narazylyǵyn týǵyzdy.
Jeli qoldanýshylary iri kompaniialar Qazaqstan naryǵynda jumys istei otyryp, memlekettik tilge jaýapkershilikpen qaraýy tiis ekenin atap ótti.
Kópshilik pikirinshe, mundai jaǵdailar kásibi redaktorlarmen jumys istemeýdiń jáne sapany baqylaýdyń álsizdigin kórsetedi.
«Eger Qazaqstanda jumys isteseń, mátindi kem degende til mamandaryna teksertý kerek», – dep jazady jeli qoldanýshylary.
Oqiǵa qoǵamda keń talqylanyp, til máselesiniń áli de ózekti ekenin kórsetti. Sarapshylardyń aitýynsha, bul tek bir kompaniianyń máselesi emes, jalpy biznestegi júieli problema.
Qoǵam belsendileri iri brendterden memlekettik tilge qurmetpen qarap, sapaly kontent usynýdy talap etýde.
