Almaty Politsiia departamenti málimetinshe, joldaǵy jaǵdaidy turaqtandyrý jáne quqyqbuzýshylyqtyń aldyn alý maqsatynda saptyq bólimsheler reid júrgizip jatyr, dep habarlaidy Dalanews.kz.
Úsh táýlik ishinde qalada jol qozǵalysy erejesin buzýdyń 5 myńnan asa deregi anyqtalǵan.
"Mas kúide kólik basqarǵan 43 júrgizýshi ustalyp, olar kólik júrgizý quqyǵynan aiyryldy. Sonymen qatar, 369 adam kólikti tiisti qujattarsyz tizgindegeni belgili boldy. 94 kólik arnaiy aiyp turaǵyna qoiyldy", - dedi politsiia.
Politsiia qyzmetkerleri túngi jarystardy anyqtap, olardyń jolyn kesken. Budan bólek, jyldamdyqty shamadan tys arttyrýdyń 2 myńnan asa deregi tirkelgen.
Vedomstvo aqparatyna súiensek, keibir júrgizýshiler óz áreketin ádeii videoǵa túsirip, áleýmettik jelilerde jariialaidy. Politsiia mundai adamdar anyqtalyp, zań aiasynda jaýapkershilikke tartylatynyn málimdedi.
Eske salaiyq, qaiǵyly oqiǵa 21 naýryzda Almatydaǵy ál-Farabi dańǵylynda boldy.
