Ulttyq Bank tóraǵasy Timýr Súleimenov Úkimet otyrysynda teńgeniń aiyrbastaý baǵamynyń dinamikasy týraly baiandady. Ol jyl basynan beri teńgeniń baǵamy bir dollar úshin 519,73 teńgege deiin, iaǵni 1%-ǵa nyǵaiǵanyn jetkizdi, dep habarlaidy Dalanews.kz.
Syrtqy faktorlar boiynsha álemdik saýda soǵystaryna bailanysty naryqtaǵy qubylmalylyq jáne Resei rýbliniń nyǵaiýy baiqalady. Sonymen qatar, munai baǵasy shamamen bir barrel úshin 70 dollar deńgeiinde qalyptasty.
Ishki faktorlar boiynsha jyldyń alǵashqy ailarynda ulttyq valiýtany qoldaýǵa importtyq satyp alýdyń qysqarýy men eksporttaýshylardyń salyq tólemderi esebinen valiýta usynysynyń ulǵaiýy áser etti.
Sonymen birge, ótken aidyń ekinshi jartysynan beri valiýta naryǵynda suranystyń artýyna bailanysty teńgeniń aiyrbastaý baǵamynyń maýsymdyq ózgerisi baiqalady. Oǵan halyq arasynda demalys kezeńiniń bastalýy, biýdjettik baǵdarlamalar men memlekettik satyp alýdy belsendi iske asyrýǵa bailanysty zańdy tulǵalar jaǵynan dollarǵa degen suranysynyń ósýi negizgi faktory boldy. Dese de, bul ózgerister qysqa merzimdi jáne birqalypty sipatqa ie.
«Jalpy syrtqy orta qalypty. Al ishki faktorlar maýsymdyq sipatqa ie. Bul jaǵdaida aiyrbastaý baǵamynyń aitarlyqtai ózgerýi úshin negiz joq. Ulttyq Bank teńgerimsizdiktiń jinaqtalýyn boldyrmaityn ikemdi baǵam belgileý rejimin ustanýdy jalǵastyrady»,
— dedi Timýr Súleimenov.
Jalpy halyqaralyq rezervter jyl basynan beri 7,4%-ǵa ósti - QR UB
Jalpy halyqaralyq rezervter jyl basynan beri 7,4%-ke ósip, maýsym aiynyń sońynda 112,3 mlrd dollar boldy. Bul týraly Ulttyq Bank tóraǵasy Timýr Súleimenov Úkimet otyrysynda habarlady.
Ol Ulttyq Banktiń altyn-valiýta rezervteri jyl basynan beri 52 mlrd dollarǵa deiin iaǵni 13,5%-ke ulǵaiǵanyn atap ótti.
Ulttyq qordyń aktivteri jyl basynan 2,6%-ke ulǵaiyp, 60,3 mlrd dollardy qurady.
«Ulttyq qorǵa túsetin túsimder jyl basynan 1,8 trln teńge, al Ulttyq qordan respýblikalyq biýdjetke transfert kólemi 3,1 trln teńge boldy. Ulttyq qordyń 6 aidaǵy investitsiialyq tabysy 7,8% nemese 4,7 mlrd dollar quraǵanyn atap ótý qajet»,— dedi Timýr Súleimenov.
Qazaqstanda qarjy zańnamasyna reforma jasalmaq
Memleket basshysynyń tapsyrmasyna sáikes biyl Qazaqstanda qarjy zańnamasyn reformalaýdyń úlken paketi daiyndalýda. Bul týraly QR Ulttyq Bankiniń Tóraǵasy Timýr Súleimenov Úkimet otyrysynda málimdedi.
Ol Ulttyq Bank makroekonomikalyq jáne qarjylyq turaqtylyqty qamtamasyz etý boiynsha jumystardy jalǵastyra beretinin atap ótti.
Infliatsiianyń ósý táýekelin azaitý úshin respýblikada dezinfliatsiialyq saiasat júrgizilmek. Aqsha-kredit saiasaty quraldarynan bólek qosymsha sharalar qabyldanady.
- Altyn satyp alý sheńberinde valiýtalyq operatsiialardy teńdestirý jalǵaspaq.
- Jeke tulǵalardyń nesieleri boiynsha kontrtsikldik kapital býferin engizý týraly sheshim qabyldandy.
- Bankter úshin mindetti rezervterdiń eń tómengi talaptaryn arttyrý jumysy pysyqtalýda.
- Aktivterdi basqarý aiasynda Ulttyq qor men Biryńǵai jinaqtaýshy zeinetaqy qorynyń portfelinde joǵary kiristilikke ie aktivterdiń úlesin ulǵaitý kózdelip otyr.
- Qarjy sektorynyń tsifrlyq transformatsiiasy jalǵasady. Tsifrlyq teńgeni masshtabtaý jumystary júrgiziledi. Bul tsifrlyq teńgeni memlekettik qarjynyń jańa baǵyttarynda engizý múmkindikterin pysyqtaýdy qamtityn bolady.
- Biyl Memleket basshysynyń tapsyrmasyna sáikes elimizdiń qarjy zańnamasy boiynsha aýqymdy reformalar toptamasy ázirlenýde. Bul toptamada bankter, tólemder, baǵaly qaǵazdar naryǵyn damytý jáne basqa da máseleler qamtylǵan. Oǵan qosa Tsifrlyq qarjy aktivterin retteýdi jáne Ulttyq tsifrlyq qarjy infraqurylymyn engizý josparlanýda. Tólem naryǵyn odan ári damytýdy jalǵastyramyz. Atalǵan sharalar qarjy sektorynyń ekonomikany damytýǵa jáne azamattardyń ál-aýqatyn jaqsartýǵa qosyp jatqan úlesin arttyrady, onyń dástúrli sektorlaryna da, jańa salalarǵa da serpin beredi.
