Qazaqstanda turǵyndar úshin aýyz sýdyń tarifin belgileýdiń jańa erejeleri engizildi. Endi jergilikti atqarýshy organdar sýdyń baǵasyn óz betinshe bekite alady, dep habarlaidy Dalanews.kz.
Bul týraly Indýstriia jáne qurylys ministrligine qarasty Qurylys jáne turǵyn úi-kommýnaldyq sharýashylyq isteri komitetiniń tóraǵasy Baqytjan Júnisbekov Ortalyq kommýnikatsiialar qyzmetinde ótken baspasóz máslihatynda aitty.
Onyń sózinshe, Sý kodeksine sáikes, endi oblystyq jáne qalalyq máslihattar bir tekshe metr aýyz sýǵa tólenetin aqy mólsherin ózderi belgilei alady.
Bul rette óńirler áleýmettik-ekonomikalyq damý deńgeiin jáne qoldanystaǵy tarifterdi eskerýi tiis.
«Qazirgi ýaqytta jergilikti atqarýshy organdar halyq úshin sýdyń qunyn aiqyndaý boiynsha jumys júrgizip jatyr», - dedi Júnisbekov.
Komitet tóraǵasy sýdy shamadan tys paidalanǵan jaǵdaida tólem mólsheri ósetinin de eske saldy.
Norma boiynsha, bir adamǵa táýligine 140 litrden artyq sý jumsalsa, artyq kólemge tariftiń 30%-y mólsherinde qosymsha aqy alynady.
Jańa júie sý resýrstaryn únemdep paidalaný jáne tarif saiasatyn óńirlik deńgeide ikemdi etýge baǵyttalǵan.
