Qazaqstanda qazylar alqasyna sottalǵandardy shartty túrde merziminen buryn bosatý, jaza merzimin qysqartý jáne ony jeńil túrge aýystyrý quqyǵyn berý usynyldy. Bul bastama Májilis depýtattary ázirlegen zań jobasynda qarastyrylǵan, dep habarlaidy Dalanews.kz.
"Qylmystyq zańnamany odan ári jetildirý máseleleri boiynsha keibir zańnamalyq aktilerge ózgerister men tolyqtyrýlar engizý týraly" zań jobasyna sáikes, jańa júie pilottyq rejimde 2026 jyldyń 1 qańtarynan bastap Aktóbe, Qaraǵandy, Shyǵys Qazaqstan oblystarynda jáne Shymkent qalasynda iske qosylmaq. Pilottyq kezeń eki jylǵa sozylady, iaǵni 2028 jyldyń 1 qańtaryna deiin jalǵasady.
Depýtattardyń aitýynsha, qazirgi tańda shartty túrde bosatý nemese jazany jeńildetý máseleleri sottarda qoǵamdyq baqylaýsyz qaralady. Ótinishterdi sottalǵandar tikelei beredi, al prokýror tek habardar etiledi. Sondyqtan bul protseste qoǵam ókilderin tartý úshin qazylar alqasynyń qatysýyn engizý usynylyp otyr.
Jańa júiege sai, mundai isterdi alty qazylar alqasy múshesi jáne bir sýdiadan turatyn quram qaraityn bolady.
Májilismender atap ótkendei, mundai tájiribe Ulybritaniia, Frantsiia, Kanada jáne Jańa Zelandiia siiaqty elderde burynnan bar jáne oń nátijesin kórsetti.
"Mysaly, AQSh-ta sottalǵandardyń shartty túrde bosatylýy sot arqyly emes, arnaiy komissiialar arqyly júzege asady. Olar úmitkerdiń bostandyqqa shyqqannan keiingi josparyn, turǵylyqty jerin jáne áleýmettik beiimdelý múmkindigin eskeredi", — delingen zań jobasynda.
Pilottyq jobanyń maqsaty — qoǵam men sot arasyndaǵy ashyqtyqty arttyrý jáne ádil sheshim qabyldaý júiesin jetildirý.
