AQSh-ta esirtkini iri kólemde tasymaldaý isi boiynsha Qazaqstan azamattary bolýy múmkin eki adam qamaýǵa alynǵan. Bul týraly Tengritravel jazdy, dep habarlaidy Dalanews.kz.
Tehas shtatynyń Chembers okrýgi sherifi keńsesiniń málimetinshe, 2025 jyldyń 27 qyrkúieginde arnaiy tergeý bólimi esirtkimen kúres basqarmasymen birlesip, I-10 tasjolynda kólikti tekserý kezinde 35 keliden asa kokain tárkilegen. Tyiym salynǵan zat kóliktiń qurylymyna muqiiat jasyrylǵany anyqtalǵan.
Kólikti Nursultan Muqtaráli (Niý-Iork) júrgizgen, al jolaýshysy Muhit Dánibekov (Pensilvaniia) bolǵan. Ekeýine de asa iri kólemde esirtki saqtady degen aiyp taǵylyp, Chembers okrýginiń túrmesine qamalǵan.
Muhittyń aǵasy Jomart Dánibekov olar kinásiz ekenin aityp, málimdeme jasady. Onyń aitýynsha, Muhit pen Nursultan - kólik tasymaldaýmen ainalysatyn júrgizýshiler, al esirtki jasyrylǵan kólik ózderine tiesili bolmaǵan.
Qazir olardyń týystary 200 myń dollar kóleminde kepil aqysyn jáne advokat jaldaý shyǵyndaryn óteý úshin qarajat jinap jatyr.
"Olar AQSh-qa adal eńbek etýge barǵan. Bótenniń qylmysy úshin jazalanbaýy kerek. Baýyrymnyń úsh qyzy bar, al jubaiy aýyr naýqas", - dedi Jomart Dánibekov.
