تەحاس شتاتىنىڭ چەمبەرس وكرۋگى شەريفى كەڭسەسىنىڭ مالىمەتىنشە، 2025 جىلدىڭ 27 قىركۇيەگىندە ارنايى تەرگەۋ ءبولىمى ەسىرتكىمەن كۇرەس باسقارماسىمەن بىرلەسىپ، I-10 تاسجولىندا كولىكتى تەكسەرۋ كەزىندە 35 كەلىدەن اسا كوكاين تاركىلەگەن. تىيىم سالىنعان زات كولىكتىڭ قۇرىلىمىنا مۇقيات جاسىرىلعانى انىقتالعان.
كولىكتى نۇرسۇلتان ءمۇقتارالى (نيۋ-يورك) جۇرگىزگەن، ال جولاۋشىسى مۇحيت دانىبەكوۆ (پەنسيلۆانيا) بولعان. ەكەۋىنە دە اسا ءىرى كولەمدە ەسىرتكى ساقتادى دەگەن ايىپ تاعىلىپ، چەمبەرس وكرۋگىنىڭ تۇرمەسىنە قامالعان.
مۇحيتتىڭ اعاسى جومارت دانىبەكوۆ ولار كىناسىز ەكەنىن ايتىپ، مالىمدەمە جاسادى. ونىڭ ايتۋىنشا، مۇحيت پەن نۇرسۇلتان - كولىك تاسىمالداۋمەن اينالىساتىن جۇرگىزۋشىلەر، ال ەسىرتكى جاسىرىلعان كولىك وزدەرىنە تيەسىلى بولماعان.
ءقازىر ولاردىڭ تۋىستارى 200 مىڭ دوللار كولەمىندە كەپىل اقىسىن جانە ادۆوكات جالداۋ شىعىندارىن وتەۋ ءۇشىن قاراجات جيناپ جاتىر.
"ولار اقش-قا ادال ەڭبەك ەتۋگە بارعان. بوتەننىڭ قىلمىسى ءۇشىن جازالانباۋى كەرەك. باۋىرىمنىڭ ءۇش قىزى بار، ال جۇبايى اۋىر ناۋقاس"، - دەدى جومارت دانىبەكوۆ.
