2025 jyldyń tamyz aiynda Qazaqstanǵa 4 myń dana shaǵyn energetikalyq generatorlardyń ákelýi sanktsiialyq taýarlardy baqylap otyratyn halyqaralyq toptardyń kúdigin týǵyzdy. Qytaidan importtalǵan bul taýarlar Reseige reeksport emes pe jáne onyń ishinde soǵysqa qajet elektronika joq pa degen suraq týyndaǵan. Jalpy 2025 jyldyń basynan bastap Qazaqstanǵa importtalǵan shaǵyn generatorlar sany 6 myńnan asyp ketken.
«Negizi Qazaqstan sanktsiialyq potentsialy bar taýarlardyń qozǵalysyn óte muqiiat baqylaidy. Syrtqy baqylaýshylar data analitika arqyly keden statistikasyndaǵy kez-kelgen anomaliiany kóre alady. Shynymen de, shaǵyn generatorlar boiynsha anomaliia bar. Biraq ol eldiń ishki sharýashylyǵyna da qajet bolýy múmkin. Basty mindet - osyny durys tekserip, anyq-qanyǵyna kóz jetkizip alý» - deidi DALA INSIDE derekkózi.
DataHub esebinshe, 2025 jyldyń tamyz aiynda elge kelgen 4 myń dana jel energetikasy generatorlary buǵan deiingi (2022–2024 jyldar) úsh jyldy qosqandaǵy statistikadan da asyp ketken. Iaǵni osynyń aldyndaǵy úsh jyldy qatar qosqanda importtai almaǵan kólem Qazaqstanǵa bir aidyń ishinde jetkizilgen. Ótken tamyzda ákelingen 4 myń qondyrǵynyń árqaisysynyń ortasha salmaǵy shamamen 1 tonna, al ortasha quny 5,9 myń dollar bolǵan. Barlyǵy derlik Qytaidyń taýary. Budan olardyń shaǵyn qondyrǵylar ekenin kórýge bolady.
«Ýkrainanyń Reseidiń munai óńdeý zaýyttaryna berip jatqan soqqysy óz apogeiine jetkendikten, jel qondyrǵylaryn Reseidiń aldaǵy qysqa daiyndyǵymen de bailanystyrýǵa bolady. Biraq bul tek versiia ǵana», - deidi, derekkóz.
Resmi statistikada Qazaqstannyń bul qondyrǵylardy Reseige eksporttap jatqany tirkelmegen. Demek, qujat boiynsha shaǵyn jel generatorlarynyń barlyǵy bizdiń eldiń aýmaǵynda qalyp otyr.
Ústimizdegi jyldyń naýryz aiynan beri Eýroodaq Qazaqstanǵa sanktsiialyq baqylaýyn sál jumsartty. Oǵan elimizdiń kedendik rásimderdi tolyq avtomattandyryp, tsifrli tańba júiesine kóshkeni sep bolǵan. Qazirgi tańda Qazaqstan úshin qaitalama sanktsiialardyń qaýpi joq. Óz tarapynan Amerika Qurama Shtattary da OFAC arqyly elimizge sanktsiialar aýyly alys ekendigin bildirip otyr.
