2025 جىلدىڭ تامىز ايىندا قازاقستانعا 4 مىڭ دانا شاعىن ەنەرگەتيكالىق گەنەراتورلاردىڭ اكەلۋى سانكسيالىق تاۋارلاردى باقىلاپ وتىراتىن حالىقارالىق توپتاردىڭ كۇدىگىن تۋعىزدى. قىتايدان يمپورتتالعان بۇل تاۋارلار رەسەيگە رەەكسپورت ەمەس پە جانە ونىڭ ىشىندە سوعىسقا قاجەت ەلەكترونيكا جوق پا دەگەن سۇراق تۋىنداعان. جالپى 2025 جىلدىڭ باسىنان باستاپ قازاقستانعا يمپورتتالعان شاعىن گەنەراتورلار سانى 6 مىڭنان اسىپ كەتكەن.
«نەگىزى قازاقستان سانكسيالىق پوتەنسيالى بار تاۋارلاردىڭ قوزعالىسىن وتە مۇقيات باقىلايدى. سىرتقى باقىلاۋشىلار داتا اناليتيكا ارقىلى كەدەن ستاتيستيكاسىنداعى كەز-كەلگەن انوماليانى كورە الادى. شىنىمەن دە، شاعىن گەنەراتورلار بويىنشا انوماليا بار. ءبىراق ول ەلدىڭ ىشكى شارۋاشىلىعىنا دا قاجەت بولۋى مۇمكىن. باستى مىندەت - وسىنى دۇرىس تەكسەرىپ، انىق-قانىعىنا كوز جەتكىزىپ الۋ» - دەيدى DALA INSIDE دەرەككوزى.
DataHub ەسەبىنشە، 2025 جىلدىڭ تامىز ايىندا ەلگە كەلگەن 4 مىڭ دانا جەل ەنەرگەتيكاسى گەنەراتورلارى بۇعان دەيىنگى (2022–2024 جىلدار) ءۇش جىلدى قوسقانداعى ستاتيستيكادان دا اسىپ كەتكەن. ياعني وسىنىڭ الدىنداعى ءۇش جىلدى قاتار قوسقاندا يمپورتتاي الماعان كولەم قازاقستانعا ءبىر ايدىڭ ىشىندە جەتكىزىلگەن. وتكەن تامىزدا اكەلىنگەن 4 مىڭ قوندىرعىنىڭ ءارقايسىسىنىڭ ورتاشا سالماعى شامامەن 1 توننا، ال ورتاشا قۇنى 5،9 مىڭ دوللار بولعان. بارلىعى دەرلىك قىتايدىڭ تاۋارى. بۇدان ولاردىڭ شاعىن قوندىرعىلار ەكەنىن كورۋگە بولادى.
«ۋكراينانىڭ رەسەيدىڭ مۇناي وڭدەۋ زاۋىتتارىنا بەرىپ جاتقان سوققىسى ءوز اپوگەيىنە جەتكەندىكتەن، جەل قوندىرعىلارىن رەسەيدىڭ الداعى قىسقا دايىندىعىمەن دە بايلانىستىرۋعا بولادى. ءبىراق بۇل تەك ۆەرسيا عانا»، - دەيدى، دەرەككوز.
رەسمي ستاتيستيكادا قازاقستاننىڭ بۇل قوندىرعىلاردى رەسەيگە ەكسپورتتاپ جاتقانى تىركەلمەگەن. دەمەك، قۇجات بويىنشا شاعىن جەل گەنەراتورلارىنىڭ بارلىعى ءبىزدىڭ ەلدىڭ اۋماعىندا قالىپ وتىر.
ۇستىمىزدەگى جىلدىڭ ناۋرىز ايىنان بەرى ەۋرووداق قازاقستانعا سانكسيالىق باقىلاۋىن ءسال جۇمسارتتى. وعان ەلىمىزدىڭ كەدەندىك راسىمدەردى تولىق اۆتوماتتاندىرىپ، ءسيفرلى تاڭبا جۇيەسىنە كوشكەنى سەپ بولعان. قازىرگى تاڭدا قازاقستان ءۇشىن قايتالاما سانكسيالاردىڭ ءقاۋپى جوق. ءوز تاراپىنان امەريكا قۇراما شتاتتارى دا OFAC ارقىلى ەلىمىزگە سانكسيالار اۋىلى الىس ەكەندىگىن ءبىلدىرىپ وتىر.
