Túrkistan oblysy, Qazyǵurt aýdanynda ornalasqan «Qazyǵurt» indýstrialdy aimaǵynda 4,9 mlrd teńgeni quraityn 8 joba júzege asyrylýda. Nátijesinde, 249 jańa jumys ornyn ashý kózdelgen. Búginde indýstrialdy aimaqta jalpy quny 2,2 mlrd teńge bolatyn 4 joba iske qosylyp, 123 jańa jumys orny ashyldy. Odan bólek, jańa óndiris oryndarynyń qurylysy qarqyndy júrgizilip jatyr, - dep habarlaidy Dalanews.kz
Túrkistan oblysy ákiminiń orynbasary Talǵat Qozbekov Qazyǵurt aýdanyna jumys saparymen baryp, «Qazyǵurt» indýstrialdy aimaǵyn aralady. Jańa jobalarmen tanysyp, jumysty pysyqtady. Jaýapty tulǵalarǵa tyń jobalardy júzege asyrý úshin investorlar tartý kerek ekenin aityp, jumysty odan ári jandandyrýdy tapsyrdy.
Qazirgi ýaqytta «Bilol» JK tarapynan 3 gektar aýmaqta bolat sharlaryn óndiretin zaýyttyń qurylysy júrgizilip jatyr. Jobanyń jyldyq qýattylyǵy – 5000-6000 tonna. Zaýyttyń qurylysy 80% aiaqtalyp, qural-jabdyqtary ornalastyrylýda.
Sonymen qatar biylǵy mamyr aiynda 2 jobanyń qurylysy bastaldy. Naqtyraq aitqanda, «TIMUR.LES» JShS jihaz, jumsaq poliýretandy kóbik jáne baǵdarlanǵan bólshekter taqtasyn shyǵaratyn zaýyt salýdy qolǵa aldy. Zaýyt iske qosylǵanda jylyna 10 myń dana jihaz óndirý josparlanýda. Sondai-aq, «AGRO irrigation» JShS sý únemdeýge arnalǵan polietilen qubyrlaryn shyǵaratyn zaýyt salmaq. Investitsiia quny 1,2 mlrd teńgeni quraityn jobanyń jyldyń qýattylyǵy – 10 000 tonna. Qazirgi ýaqytta kásiporyndar salýǵa qajetti jer telimderi rásimdelip, investorlar zaýyttardyń qurylys jumystaryna kirisken. «Sapa 2002» JShS 150 gektar jerge jańbyrlatyp sýǵarý júiesin endirý jumystaryn júrgizýde.
Odan bólek, «Kórik ShQ» JShS 2018 jyldyń qazan aiynan bastap alkogolsiz tabiǵi shyryndy sýsyndar shyǵarýda. Joba qýattylyǵy jylyna – 1 myń tonna. 2019 jyldyń qarasha aiynda «CG Foods Central Asia» JShS tez ázirlenetin taǵamdar óndirisin iske qosqan. Óndiris qýattylyǵy jylyna – 1100 tonna. Kásiporyn ónimderin Qazaqstannan bólek, Resei jáne Orta Aziia elderine eksporttaýda. Munda 100 adam jumyspen qamtylǵan. Indýstrialdy aimaqta «Asyl» JShS-niń avtomattandyrylǵan aýyz sý júiesi jáne kapsýlalalar óndirisi iske qosylǵan. Sonymen qatar «Sabit» sharýa qojalyǵy «Aǵanai» sý qoimasyna 200 myń shabaq tastap, balyq ósirýmen ainalysýda.
