Qazaqstannyń ishki ister vitse-ministri – Qylmystyq-atqarý júiesi komitetiniń (QAJK) tóraǵasy Abai Qaiyrbekov burynǵy ulttyq ekonomika ministri Kýandyq Bishimbaevtyń jazasyn óteý jaǵdaiy týraly aitty, dep habarlaidy Dalanews.kz.
Qaiyrbekovtyń aitýynsha, Bishimbaev túzetý mekemesinde ózge sottalǵandarmen teń jaǵdaida otyr.
«Bishimbaev jazasyn qylmystyq-atqarý zańnamasynyń barlyq talaptaryna sáikes, basqa sottalǵandarmen birdei jaǵdaida ótep jatyr», – dedi QAJK tóraǵasy.
Sheneýnik onyń eńbekke tartylýy men tabysyna qatysty suraqqa jaýap berip, mundai málimetter jeke derekter sanatyna jatatynyn atap ótti.
«Sottalǵandardy jumysqa ornalastyrý máselesi jeke derekterge jatady jáne bul aqparat tek týystary men advokattaryna ǵana beriledi. Jalpy alǵanda, bizdiń mekemelerde sottalǵandardyń shamamen jartysy eńbekpen qamtylǵan. Biyl biz jumys isteitinder sanyn úsh myń adamǵa arttyrdyq jáne bul baǵyttaǵy jumysty jalǵastyramyz», – dedi vitse-ministr.
Jýrnalister eks-ministrdiń jeke kamerada ustalyp-ustalmaitynyn da surady.
«Men aitqandai, ol jazasyn jalpy negizde, basqa sottalǵandarmen birge ótep jatyr. Bul sottalǵanǵa qatysty erekshe jaǵdailar, jeńildikter nemese arnaiy talaptar joq», – dep naqtylady Qaiyrbekov.
Eske salaiyq, byltyr 13 mamyrda Astanada Saltanat Núkenovanyń ólimi boiynsha sot protsesi aiaqtalǵan bolatyn. Sot burynǵy ulttyq ekonomika ministri Kýandyq Bishimbaevty azamattyq jubaiyn azaptap óltirdi dep tanyp, ony 24 jylǵa bas bostandyǵynan aiyrdy.
