قازاقستاننىڭ ىشكى ىستەر ۆيسە-مينيسترى – قىلمىستىق-اتقارۋ جۇيەسى كوميتەتىنىڭ (قاجك) ءتوراعاسى اباي قايىربەكوۆ بۇرىنعى ۇلتتىق ەكونوميكا ءمينيسترى كۋاندىق بيشىمبايەۆتىڭ جازاسىن وتەۋ جاعدايى تۋرالى ايتتى، دەپ حابارلايدى Dalanews.kz.
قايىربەكوۆتىڭ ايتۋىنشا، بيشىمبايەۆ تۇزەتۋ مەكەمەسىندە وزگە سوتتالعاندارمەن تەڭ جاعدايدا وتىر.
«بيشىمبايەۆ جازاسىن قىلمىستىق-اتقارۋ زاڭناماسىنىڭ بارلىق تالاپتارىنا سايكەس، باسقا سوتتالعاندارمەن بىردەي جاعدايدا وتەپ جاتىر»، – دەدى قاجك ءتوراعاسى.
شەنەۋنىك ونىڭ ەڭبەككە تارتىلۋى مەن تابىسىنا قاتىستى سۇراققا جاۋاپ بەرىپ، مۇنداي مالىمەتتەر جەكە دەرەكتەر ساناتىنا جاتاتىنىن اتاپ ءوتتى.
«سوتتالعانداردى جۇمىسقا ورنالاستىرۋ ماسەلەسى جەكە دەرەكتەرگە جاتادى جانە بۇل اقپارات تەك تۋىستارى مەن ادۆوكاتتارىنا عانا بەرىلەدى. جالپى العاندا، ءبىزدىڭ مەكەمەلەردە سوتتالعانداردىڭ شامامەن جارتىسى ەڭبەكپەن قامتىلعان. بيىل ءبىز جۇمىس ىستەيتىندەر سانىن ءۇش مىڭ ادامعا ارتتىردىق جانە بۇل باعىتتاعى جۇمىستى جالعاستىرامىز»، – دەدى ۆيسە-مينيستر.
جۋرناليستەر ەكس-مينيستردىڭ جەكە كامەرادا ۇستالىپ-ۇستالمايتىنىن دا سۇرادى.
«مەن ايتقانداي، ول جازاسىن جالپى نەگىزدە، باسقا سوتتالعاندارمەن بىرگە وتەپ جاتىر. بۇل سوتتالعانعا قاتىستى ەرەكشە جاعدايلار، جەڭىلدىكتەر نەمەسە ارنايى تالاپتار جوق»، – دەپ ناقتىلادى قايىربەكوۆ.
ەسكە سالايىق، بىلتىر 13 مامىردا استانادا سالتانات نۇكەنوۆانىڭ ءولىمى بويىنشا سوت پروسەسى اياقتالعان بولاتىن. سوت بۇرىنعى ۇلتتىق ەكونوميكا ءمينيسترى كۋاندىق بيشىمبايەۆتى ازاماتتىق جۇبايىن ازاپتاپ ءولتىردى دەپ تانىپ، ونى 24 جىلعا باس بوستاندىعىنان ايىردى.
