Aýyl sharýashylyǵy mınıstri Aıdarbek Saparovty ótirik aqparat taratty dep aıyptaǵannan keıin jýrnalıs Kırıl Pavlov qamaýǵa alynýy múmkin, dep habarlaıdy Dalanews.kz.
"Meni Qylmystyq kodekstiń 456-2-babynyń 4-bóligi (jalǵan aqparatty ornalastyrý jáne taratý) baby boıynsha aıyptap jatyr. Bul qamaýǵa alýdy kózdeıdi. Sotty birden, sol jerde ótkizbekshi. Nelikten meniń materıalym lısenzıasy bar BAQ-ta jarıalanǵanyna qaramastan, onlaın-platforma qoldanýshylaryna arnalǵan 4-bólik boıynsha qaralyp jatqanyn túsindirmeıdi. Al aqparattyń “jalǵandyǵy” nede? Aýyl sharýashylyǵy mınıstrliginiń resmı buıryǵyn keltirgenim be? Ony da aıtpaı otyr", – dep jazdy Pavlov.
Bul jaǵdaıǵa baılanysty KazTAG redaksıasy Astana qalalyq polısıa departamentiniń (PD) baspasóz qyzmetine habarlasty.
Sonymen qatar Qazaqstan jýrnalıser odaǵynyń astanalyq fılıalynyń tóraǵasy Ámir Qasenov te Pavlovqa qatysty is boıynsha PD men İshki ister mınıstrliginiń baspasóz qyzmetine resmı saýal joldaǵan.
Qasenovtiń pikirinshe, Pavlovqa qarsy qozǵalǵan is Qazaqstanda qos standartty saıasattyń qalyptasyp kele jatqanyn kórsetedi.
"Pavlov aýyl sharýashylyǵy salasyndaǵy keleńsiz máseleler týraly jıi jazady, sol úshin ony qýdalap otyr. Biraq nege biz aýyl sharýashylyǵy mınıstri Aıdarbek Saparovtyń ózine qatysty is qozǵalǵany týraly estimeımiz? Ol eldiń sút ónimderimen tolyq qamtamasyz etilgenin aıtty.
Sondaı-aq Ekibastuz JEO-daǵy apatqa deıin "qysqa tolyq daıynbyz" degen sheneýnikterge, ne bolmasa úlken sý tasqyny aldynda "Qazaqstan sý tasqynyna daıyn" dep málimdegenderge qatysty jalǵan aqparat úshin is qozǵalǵanyn da kórmedik.
Tipti, pandemıa kezinde blok-bekettegi adam ólimine qatysty “polısıa qyzmetkeri emes, bóten adam kináli, al polıseıdiń formasyn kez kelgen áskerı dúkennen satyp alýǵa bolady” degenderdi de eshkim jaýapqa tartqan joq.
Bul bılik ókilderiniń ashyq ótirikteriniń sheksiz tizbegi, al sol ótiriktiń artynda kóbine adam taǵdyry men elge keltirilgen orasan zalal turady", – dedi Ámir Qasenov.
