Qyrǵyzstanda prezident Sadyr Japarovtyń jienine úilenbek bolǵan burynǵy kúieý jigitke úkim shyqty. Aftandil Sabyrbekovke esirtki taratý jáne qarýdy zańsyz ainalymǵa salý aiyby taǵylǵan edi, dep habarlaidy Dalanews.kz.
Aftandil Sabyrbekov 2024 jyldyń jazynda qoǵamǵa tanylǵan bolatyn. Ol prezident Sadyr Japarovtyń jieni Lazzat Nurqojoevaǵa tikushaq jaldap, úilený týraly usynys jasaǵan edi. Oqiǵanyń videosy áleýmettik jelide keńinen tarap, úlken qoǵamdyq rezonans týǵyzǵannan keiin Sadyr Japarov bolashaq kúieý balasynyń ysyrapshyldyǵy úshin keshirim suraýǵa májbúr boldy.
Bir aidan keiin Aftandil Sabyrbekov pen onyń baýyrynyń ustalǵany belgili boldy. Keiin Sadyr Japarovtyń baspasóz hatshysy Nurqojoevanyń kúieý jigitiniń qamaýǵa alynýyna qatysty pikir bildirip, «múmkin ol óz qylmystyq isteri úshin qamqorshylar izdegen shyǵar», – dep málimdegen edi.
Al Lazzat Nurqojoeva 2025 jyldyń aqpanynda grek-rim kúresiniń balýany, Qyrǵyzstannyń olimpiadalyq quramasynyń múshesi Amantýr Ismailovqa turmysqa shyqty.
10 qazanda Bishkektiń Birinshi mai aýdandyq soty Aftandil Sabyrbekovke qatysty úkim shyǵardy. Sot ony «Esirtki zattaryn, psihotroptyq zattar men olardyń analogtaryn ótkizý maqsatynda zańsyz daiyndaý» jáne «Prekýrsorlardy zańsyz daiyndaý» baptary boiynsha qylmys quramynyń bolmaýyna bailanysty aqtady.
Sonymen qatar, Sabyrbekov «Qarýdy jáne oq-dárilerdi zańsyz ainalymǵa salý» baby boiynsha kináli dep tanyldy. Sot oǵan 2 jyl 6 ai merzimge bas bostandyǵynan aiyrý jazasyn taǵaiyndap, «qamaýdaǵy bir kún eki kún bas bostandyǵynan aiyrýǵa teń» dep eseptedi. 2024 jylǵy 4 shildeden 2025 jylǵy 10 qazanǵa deiin qamaýda bolǵan merzimin eskere otyryp, jazasy tolyq óteldi dep sanaldy. Aftandil Sabyrbekov sot zalynda bosatyldy.
Onyń baýyry Tariel Sabyrbekov te birneshe bap boiynsha qylmys quramynyń bolmaýyna bailanysty aqtaldy. Alaida ol «Prokýror, tergeýshi nemese anyqtaý organy qyzmetine kedergi keltirý» baby boiynsha kináli dep tanylyp, 2 jylǵa bas bostandyǵynan aiyryldy. Biraq bul jaza da tolyq óteldi dep eseptelip, ol da sot zalynan bosatyldy.
