Túrkistanda tigilgen eń úlken sáýkele Qazaqstannyń rekordtar kitabyna engizildi. Biregei eksponat 30-dan astam túrki halyqtarynyń oiý-órnekterimen bezendirilgen. Áielderge arnalǵan ulttyq bas kiimniń biiktigi 5 metrden asady, al jabýy 600 metr. Sonymen qatar, sáýkele halyqaralyq «Global Book of Records» rekordtar kitabyna enip, arnaiy sertifikat tabystaldy, dep habarlaidy Dalanews.kz
Tarihi sátte Túrkistanǵa Qazaqstannyń rekordtar kitabynyń resmi ókili Qýandyq Qudaibergenov arnaiy elip, sáýkeleniń rekordtyq mártebesin resmi túrde jariialady. Ol álemde mundai úlken bas kiimdi eshkim jasamaǵanyn atap ótip, jobany Ginnestiń úshinshi álemdik rekordtar kitabyna engizý úshin tirkeý bastalǵandyǵyn aitty.
Joba avtory Aqmaral Daýylbaevanyń aitýynsha, ulttyq bas kiim - bul kiimniń elementi ǵana emes, halyq birligi men rýhani sabaqtastyqtyń ainasy.
«Sáýkelemizdiń biiktigi kókpen talasyp, shyńmen tiresip tursyn dedik. Sondyqtan ony 5 metr 20 santimetr etip jasadyq. Al, oiý-órnegin tereń maǵynamen kómkerýdi jón kórip, sáýkeleniń keipinen Jer ananyń beinesin jasadyq. Bir qolymen álemdi, bir qolymen besikti terbetken Ana - ómirdiń máńgiligin, tirshiliktiń túp-tamyryn bildiredi. Sol sebepti oiýyn ómir aǵashy beinesinde órnektedik»,- dedi joba avtory.
