KazTAG aqparat agenttiginiń bas redaktory Amir Qasenov ózine qatysty bultartpaý sharasy qatańdatylǵannan keiin qurǵaq ashtyq jariialady, dep habarlaidy dalanews.kz.
Almaty soty jýrnalistiń úiqamaqtaǵy mártebesin kúzetpen ustaý túrindegi qamaýǵa aýystyrǵan. Buǵan deiin sot Qasenovtiń úiqamaq talaptaryn birneshe ret buzǵanyn, sonyń ishinde áleýmettik jelilerde jariialanymdar jasaǵanyn jáne sot otyrysyna kelmegenin málimdegen bolatyn.
Sot sheshiminen keiin jariialanǵan videoda Amir Qasenov bul isti ádil sot emes, «sottalý» dep baǵalap, qarsylyq retinde qurǵaq ashtyq bastaitynyn málimdedi.
«Meni zańsyz túrde tiridei sottaýǵa jol bermeimin. Meniń máiitimdi sottaisyńdar. Bul – sot emes, sottalý. Osy sátten bastap tolyq qurǵaq ashtyq jariialaimyn», – dedi ol.
Qasenovke qatysty qylmystyq is sońǵy aptalarda qoǵamda qyzý talqylanyp keledi. Bas redaktor buǵan deiin Prezident Qasym-Jomart Toqaevqa videoúndeý jasap, ózin jýrnalistik qyzmeti úshin qýdalap jatqanyn málimdegen edi. Onyń málimdemesinen keiin birqatar jýrnalister, quqyq qorǵaýshylar men advokattar qoldaý bildirdi.
Qorǵaýshylar tarapy iste protsessýaldyq zańbuzýshylyqtar bar ekenin aityp keledi. Al quqyq qorǵaý organdary men aiyptaý taraby tergeý men sot protsesi zań talaptaryna sáikes júrgizilip jatqanyn málimdeýde.
Aita keteiik, Amir Qasenov pen KazTAG basshylyǵyna qatysty is boiynsha kelesi sot otyrysy 22 maýsymǵa belgilengen.
