Aqtóbe qalasyndaǵy Saqtaǵan Báiishev atyndaǵy ýniversitetke Beket ata esimin berý jónindegi bastama qoǵamda qyzý talqylanýda. Bul usynys qyrkúiek aiynyń sońynda Aqtaýda ótken Beket atanyń 275 jyldyǵyna arnalǵan halyqaralyq ǵylymi konferentsiiada kóterilgen bolatyn. Konferentsiiaǵa qatysqan mańǵystaýlyq ziialy qaýym ókilderi men ǵalymdar atalǵan usynysty qoldaǵan, dep habarlaidy Dalanews.kz
Alaida, tarihshy jáne ólketanýshy Jánibek Qojyq bul bastamaǵa qarsy pikir bildirip, áleýmettik jeli arqyly úndeý joldady. Onyń aitýynsha, áýlie Beket atanyń esimin kez kelgen nysanǵa nemese mekemege berýge bolmaidy.
«Beket ata – rýhani temirqazyǵymyz. Ol ataqqa, jarnamaǵa zárý emes. Ýniversitetke onyń atyn bersek, erteń bir oqytýshy paramen ustalsa, áýlieniń aty da jańalyqpen birge atalady. Bul – qasietti esimge kóleńke túsirý», – dedi ólketanýshy.
Jánibek Qojyq buǵan deiin de Beket ata beinesiniń sýretke salynyp, medal nemese kino róli retinde paidalanylýyna qarsy shyqqanyn eske saldy. Onyń aitýynsha, burynǵy úlkender Beket atanyń atyn qurmetpen ǵana atap, tek «Ataǵa baramyn», «Atadan kelemin» dep sóilegen.
«Beket atanyń óz ósietinde “Meniń atymdy kez kelgen jerde atai bermeńder, tek qinalǵanda, qoryqqanda atańdar” degen sóz bar. Sondyqtan bul qasietti esimdi kúndelikti tirshilik pen saiasatqa aralastyrýǵa bolmaidy», – dedi ol.
Jýrnalist Almat Ábdiraman da bul pikirdi qoldap, áleýmettik jelidegi jazbasynda Beket atanyń esimi qasietti rýhtyń nyshany ekenin atap ótti.
«Beket ata – árýaqtyń aty, rýhtyń qorǵany. Ony tirliktiń aiqai-shýyna aralastyrý qasietti sýǵa lai aralastyrǵanmen teń. Áýlieniń atyn ǵimaratqa emes, sanaǵa sińirý kerek. Eger keiingi urpaq Beket ata degende iman men tazalyqty elestetse, mine – sol eń úlken qurmet», – dep jazdy jýrnalist.
Búginde bastama boiynsha resmi sheshim qabyldanǵan joq. Degenmen, ziialy qaýym men el azamattary áýlieniń atyn qurmetteýdiń, rýhani muraǵa jaýapkershilikpen qaraýdyń mańyzy jóninde túrli kózqarastaryn bildirýde.
