Talǵarda bolǵan kisi óltirý jáne bala urlaý faktisi boiynsha tergeý aiaqtaldy. Bul týraly advokattar Asylbek Abdraimov pen Jandos Palmanov Instagram paraqshasynda jazdy, dep habarlaidy Dalanews.kz.
«Barlyq dálelder men saraptamalar qaraldy. Nátijelerimen tanystyq. Qazir is materialdarymen tanysý satysy júrip jatyr, iaǵni sotqa daiyndyq kezeńi bastaldy», – dedi Abdraimov.
Istiń basty figýrantyna Qylmystyq kodekstiń 12 baby boiynsha aiyp taǵylǵan:
– 99-bap – Adam óltirý;
– 125-bap – Adam urlaý;
– 120-bap – Zorlaý;
– 121-bap – Jynystyq sipattaǵy kúsh qoldaný áreketteri;
– 190-bap – Alaiaqtyq;
– 147-bap – Jeke ómirge qol suǵylmaýshylyqty buzý;
– 149-bap – Turǵyn úige zańsyz kirý;
– 115-bap – Qorqytý;
– 287-bap – Qarý-jaraqty zańsyz saqtaý, tasymaldaý nemese alyp júrý;
– 288-bap – Qarý-jaraqty zańsyz daiyndaý;
– 200-bap – Kólikti urlaý maqsatynsyz zańsyz ielený;
– 132-bap – Kámeletke tolmaǵandy qylmys jasaýǵa tartý.
Sonymen qatar bul is boiynsha taǵy eki kámeletke tolmaǵan kúdiktige adam óltirý jáne adam urlaý baptary boiynsha aiyp taǵylǵan.
Eske salaiyq, 6 qyrkúiek kúni Almaty oblysy Talǵar qalasynda er adam burynǵy azamattyq jubaiynyń baýyryn atyp óltirip, onyń eki jasar qyzyn urlap ketken bolatyn. Keiin politsiia kúdiktini ustap, balany anasymen qaýyshtyrdy. Al oblystyq prokýratýra politseilerdiń áreketsizdigi faktisi boiynsha jeke is qozǵady.
