Májilis depýtaty Samat Nurtaza telefony joǵalǵanyn aitty, al ishki ister ministri Erjan Sádenov "tabamyz" dep sendirdi, dep habarlaidy Dalanews.kz.
Depýtat Samat Nurtaza aryzy bir jarym jyldan beri Esil aýdandyq politsiia basqarmasynda jatqanyn aitty.
"1,5 mln kameramyz bar. 58 paiyz qylmys ashylyp jatyr" dedińiz. Qarapaiym suraq. Joǵalǵan, urlanǵan smartfondar nege tabylmaidy? Sizdiń orynbasarlaryńyz "smartfondardy shashyp tastaidy da, Qyrǵyzstanǵa alyp ketedi, biz taba almaimyz" deidi. Ýchaskelik politsei nesine ýchaskelik politsei?!" - dep ashyndy ol.
Depýtat másele tek ózine qatysty emes ekenin, halyq mundai jaǵdaiǵa jii tap bolatynyn aitty.
"Iá, mundai másele bar, kemshilikter de joq emes. Bul baǵytta jumys júrip jatyr. Kún saiyn aitylǵan syn-pikirler eskeriledi. Árbir qylmys boiynsha tergeýshi sebepteri men mán-jaiyn anyqtap, keiin ózge qyzmetterge joldaidy. Suraq óte oryndy, mańyzdy... Qarastyramyz, tabamyz", - dedi ministr.
