Almatyda tolassyz jaýǵan jańbyrdan keiin qalanyń birqatar kóshesinde sý jinaldy. Áleýmettik jeli qoldanýshylary joldar men jaiaý júrginshilerge arnalǵan bólikterdiń jai-kúiin kórsetip, aryq júiesiniń nóser sýyn ótkize almai jatqanyna shaǵymdandy, dep habarlaidy dalanews.kz.
Turǵyndardyń sózinshe, jaýyn-shashyn kezinde kei ýchaskelermen jaiaý júrý qiyndap, kólik qozǵalysyna da kedergi kelgen. Almatylyqtar mundai jaǵdaidyń jańbyr jaýǵan saiyn qaitalanatynyn aityp, sý burý júiesiniń tiimdiligine kúmán keltirdi.
Almaty ákimdigi 10 qarashada aýa raiynyń kúrt buzylatynyn aldyn ala eskertken. "Qazgidromet" boljamyna sáikes, jaýyn-shashyn 10 qarasha keshinen 12 qarashaǵa qaraǵan túnge deiin jalǵasady.
Qolaisyz aýa raiyna bailanysty kommýnaldyq qyzmetter kúsheitilgen jumys rejimine kóshirilgen. Ákimdiktiń málimetinshe, sý basý qaýpiniń aldyn alý jáne onyń saldaryn joiý úshin 1 579 adamnan quralǵan 85 jedel brigada kezekshilik atqarady. Jumysqa 415 tehnika men 97 motopompa daiyndalyp, 2 950 qap qum ázirlengen. Buǵan qosa, qalany kúndelikti tazalaý jumystaryna 3 080 jumysshy men 1 225 arnaiy tehnika tartylmaq.
Aita keteiik, 9 qarashadaǵy ákimdik málimeti boiynsha, Almatyda aryq júiesine qatysty 129 problemalyq ýchaske anyqtalǵan. Sonyń 125-inde jumys aiaqtalyp, qalǵan tórt ýchaskede jóndeý jalǵasyp jatyr. Qala ákimi Darhan Satybaldy sý basý máselesin keshendi sheship, jańbyr sýyn jinaityn jáne buratyn arnaiy rezervýarlar salý múmkindigin qarastyrýdy tapsyrǵan.
Eske salaiyq, buǵan deiin de almatylyqtar Taraz jáne Masanchi kóshelerinde, sondai-aq "Altyn Orda" bazary mańynda jańbyr sýynyń jinalatynyn aityp, birneshe ret shaǵymdanǵan. Qala biligi kei jaǵdaida aryqtardyń turmystyq qoqys pen topyraqtan bitelýi sýdyń ótýine kedergi keltiretinin málimdegen.
