Almatyda qarbalas ýaqytta keptelisti ainalyp ótpek bolǵan áiel kóligimen velosipedshilerge arnalǵan jolǵa shyǵyp ketken. Júrgizýshiniń áreketi videoǵa túsip, politsiia nazaryna ilikti, dep habarlaidy dalanews.kz.
Quqyq qorǵaý organdary kólik tizginindegi áieldiń jeke basyn anyqtap, jol belgisiniń talabyn buzǵany úshin ákimshilik hattama toltyrdy. Sondai-aq onymen jol qozǵalysy erejelerin saqtaý jóninde túsindirý jumysy júrgizildi.
Politsiia ókilderi velosiped jolymen avtokólik júrgizýge tyiym salynatynyn eskertti. Alaida tártip buzýshyǵa naqty qandai jaza qoldanylǵany habarlanǵan joq.
Mundai quqyq buzýshylyq úshin Qazaqstan Respýblikasynyń Ákimshilik quqyq buzýshylyq týraly kodeksiniń 601-babynda jaýapkershilik kózdelgen. Jol erejesin alǵash ret buzǵan júrgizýshige 3 AEK, iaǵni 12 975 teńge kóleminde aiyppul salynýy múmkin.
