Oblys ákiminiń orynbasary Nurbol Turashbekov Keles aýdanyndaǵy «Ýmarov N» sharýa qojalyǵynyń qaıta óńdeý sehyn aralap, jumysymen tanysty, dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Kásipker tamshylatyp sýǵarýǵa arnalǵan ıilgish tútik shyǵarý úshin 2023 jyly Qytaı elinen arnaıy qondyrǵy alyp, iske qosqan.
Qurylǵy saǵatyna 12000 metr ónim óndirýge qýatty. Kásiporynda sonymen qatar, jylyjaıǵa qoldanylatyn plenka jáne jip shyǵarylady. Qoldanystan shyqqan polıetılen zattaryn qaıta tereń óńdeý arqyly kóshet egýge qajetti qutylar jasaý da jolǵa qoıylǵan. Seh 6 adamdy turaqty jumyspen qamtyp otyr.
Sharýa qojalyǵynyń basshysy Nurjan Omarov sondaı-aq, óz jylyjaı kesheninde maýsymdyq kezeńde 25 azamatty jumyspen qamtamasyz etetinin jetkizdi.
Maqtaaral aýdanyndaǵy «Cotton Maı» jaýapkershiligi shekteýli seriktestigi de shetelden jetkizilgen avtomattandyrylǵan qondyrǵylar ornatyp, jańa tehnologıamen maqta maıyn óndirýdi bastady. Kásiporyn táýligine 2 myń tonna shıtti óńdeýge qaýqarly.
Nurbol Turashbekov aýyl sharýashylyǵyn damytýda jańashyldyq mańyzdy ekenin atap ótti.
– Tereń óńdeý tehnologıasy men onyń paıdasy týraly sharýalardy keńinen aqparattandyrý qajet. Zaman talabyna saı ónim usyný úshin tehnologıalyq jetistikterden shet qalmaýymyz shart. Osy baǵyttaǵy jumysty retteý arqyly naryqtaǵy aınalymdy da bir júıege keltirýge bolady, – dedi ol.
Oblys ákiminiń orynbasary jaýapty mamandarǵa kásipkerlermen jáne sharýalarmen kelise otyryp, bul baǵytta naqty usynystar ázirleýdi tapsyrdy.
