"Kúdikti jazadan sytylyp ketýi múmkin". Shymkentte qaza tapqan Nuraı Serikbaıdyń aǵasy osylaı dep málimdedi. Onyń aıtýynsha, kisi ólimine kúdikti Sherhan Aımahan qazir Shymkenttegi ızolátorda emes. Sondaı-aq, júrgizilgen saraptama qorytyndysynda onyń psıhıkalyq aýytqýy bar ekeni kórsetilgen. Alaıda jábirlenýshi tarap bul tujyrymmen kelispeıdi. Bul týraly "Jetinshi arnanyń" reportajynda aıtylǵan, dep habarlaıdy Dalanews.kz.

Nuraı Serikbaıdyń aǵasy kúdiktiniń deni saý ekenine senimdi.

"Ol jalǵan anyqtama jasatyp, jazadan qutylyp ketýi múmkin dep qorqamyz", - deıdi ol.

Onyń aıtýynsha, úsh aıǵa sozylǵan tergeýden de áli eshqandaı mardymdy jaýap almaǵan. 

"Birinshisi Shymkentte qaralǵan bolatyn, "psıhıkalyq aýytqýy baıqalǵan" dep anyqtama bergen. Biz oǵan senbeı, Almatydan saraptama talap ettik, kúdikti sol jaqqa bardy, ol jaqta da osyndaı anyqtama berdi. Endi bul jerde sımýlásıanyń maksımaldy belgileri kórinip tur. Óıtkeni kúdikti - kádimgi ortada ómir súrip júrgen adam, saý adam. Estigenim boıynsha qazir kúdikti Shymkent qalasynda emes. Ol Talǵardaǵy psıhıkalyq emdeý ortalyǵynda. "Emdelip jatyr" degen anyqtama alǵansha, ol jaqta ýaqytyn ótkize beredi", - dedi Sultan Serikbaı.

Jábirlenýshi taraptyń advokaty Aıanhan Omarov ta tergeý sozylyp jatqanyn joqqa shyǵarmaıdy. Kúdiktiniń minez-qulqyn anyqtaýǵa arnalǵan saraptamalardyń nátıjesi de áli jarıalanbaǵanyn aıtady.

Aıta keteıik, 11 qańtarda Shymkentte 21 jastaǵy Nuraı Serikbaı pyshaq jaraqattarynan kóz jumdy. Qaıǵyly oqıǵa beınebaqylaý kameralaryna túsip qalǵan.

Marqumnyń týystarynyń aıtýynsha, Nuraı Serikbaı 11 ret pyshaq jaraqatyn alǵan.

Keıinirek polısıa qyzmetkerleri jedel izdestirý is-sharalary barysynda 21 jastaǵy turǵyndy óltirdi degen kúdikti er adamdy ustady.

Sonymen qatar, Prezıdent Ulttyq quryltaıda shymkenttik Nuraıdyń ólimine qatysty pikir bildirdi.