Qazaqstanda aldaǵy jyldary energetika salasyn jańǵyrtýǵa baǵyttalǵan aýqymdy joba iske asady. Energetika ministrliginiń málimetinshe, 2030 jylǵa deiin elde jańa elektr qýat kózderi iske qosylady, dep habarlaidy Dalanews.kz.
Ulttyq joba aiasynda 2026–2030 jyldary jalpy qýaty 7,8 gigavatt bolatyn jańa jáne jańǵyrtylǵan nysandar paidalanýǵa beriledi. Onyń ishinde segiz jańa elektr stantsiiasyn salý jáne jumys istep turǵan 11 stantsiiany modernizatsiialaý josparlanǵan.
Bul bastama eldegi elektr energiiasyna suranystyń artýyn óteýge, sondai-aq energetikalyq infraqurylymdy keshendi túrde jańartýǵa baǵyttalǵan. Negizgi basymdyq turaqty ári bazalyq qýat kózderin qalyptastyrýǵa berilmek. Nátijesinde, Biryńǵai elektr energetikalyq júieniń senimdiligi kúsheiedi.
Jańa qurylys jobalarynyń jalpy qýaty 5,3 gigavatty quraidy. Atap aitqanda, Kýrchatov qalasynda 700 MVt bolatyn kondensatsiialyq elektr stantsiiasy, Ekibastuzda qýaty 2640 MVt-qa jetetin GRES-3, sondai-aq Qaraǵandy men Ekibastuzda jylý elektr stantsiialary boi kóteredi.
Sonymen qatar Jezqazǵan, Kókshetaý, Semei jáne Óskemen qalalarynda jańa jylý elektr ortalyqtaryn salý kózdelgen. Bul jobalar óńirlerdegi energiia tapshylyǵyn azaityp, ónerkásip pen turǵyndardy turaqty elektrmen qamtamasyz etýge múmkindik beredi.
Jańǵyrtý jumystary da nazardan tys qalmaidy. Qoldanystaǵy stantsiialardy modernizatsiialaý nátijesinde jabdyqtardyń tozý deńgeii shamamen 13 paiyzǵa tómendeidi dep kútilýde.
Jalpy, bul joba eldiń energetikalyq qaýipsizdigin nyǵaityp, ekonomikanyń turaqty damýyna serpin bermek.
