قازاقستاندا الداعى جىلدارى ەنەرگەتيكا سالاسىن جاڭعىرتۋعا باعىتتالعان اۋقىمدى جوبا ىسكە اسادى. ەنەرگەتيكا مينيسترلىگىنىڭ مالىمەتىنشە، 2030 جىلعا دەيىن ەلدە جاڭا ەلەكتر قۋات كوزدەرى ىسكە قوسىلادى، دەپ حابارلايدى Dalanews.kz.

ۇلتتىق جوبا اياسىندا 2026–2030 جىلدارى جالپى قۋاتى 7،8 گيگاۆاتت بولاتىن جاڭا جانە جاڭعىرتىلعان نىساندار پايدالانۋعا بەرىلەدى. ونىڭ ىشىندە سەگىز جاڭا ەلەكتر ستانسياسىن سالۋ جانە جۇمىس ىستەپ تۇرعان 11 ستانسيانى مودەرنيزاسيالاۋ جوسپارلانعان.

بۇل باستاما ەلدەگى ەلەكتر ەنەرگياسىنا سۇرانىستىڭ ارتۋىن وتەۋگە، سونداي-اق ەنەرگەتيكالىق ينفراقۇرىلىمدى كەشەندى تۇردە جاڭارتۋعا باعىتتالعان. نەگىزگى باسىمدىق تۇراقتى ءارى بازالىق قۋات كوزدەرىن قالىپتاستىرۋعا بەرىلمەك. ناتيجەسىندە، ءبىرىڭعاي ەلەكتر ەنەرگەتيكالىق جۇيەنىڭ سەنىمدىلىگى كۇشەيەدى.

جاڭا قۇرىلىس جوبالارىنىڭ جالپى قۋاتى 5،3 گيگاۆاتتى قۇرايدى. اتاپ ايتقاندا، كۋرچاتوۆ قالاسىندا 700 مۆت بولاتىن كوندەنساسيالىق ەلەكتر ستانسياسى، ەكىباستۇزدا قۋاتى 2640 مۆت-قا جەتەتىن گرەس-3، سونداي-اق قاراعاندى مەن ەكىباستۇزدا جىلۋ ەلەكتر ستانسيالارى بوي كوتەرەدى.

سونىمەن قاتار جەزقازعان، كوكشەتاۋ، سەمەي جانە وسكەمەن قالالارىندا جاڭا جىلۋ ەلەكتر ورتالىقتارىن سالۋ كوزدەلگەن. بۇل جوبالار وڭىرلەردەگى ەنەرگيا تاپشىلىعىن ازايتىپ، ونەركاسىپ پەن تۇرعىنداردى تۇراقتى ەلەكترمەن قامتاماسىز ەتۋگە مۇمكىندىك بەرەدى.

جاڭعىرتۋ جۇمىستارى دا نازاردان تىس قالمايدى. قولدانىستاعى ستانسيالاردى مودەرنيزاسيالاۋ ناتيجەسىندە جابدىقتاردىڭ توزۋ دەڭگەيى شامامەن 13 پايىزعا تومەندەيدى دەپ كۇتىلۋدە.

جالپى، بۇل جوبا ەلدىڭ ەنەرگەتيكالىق قاۋىپسىزدىگىن نىعايتىپ، ەكونوميكانىڭ تۇراقتى دامۋىنا سەرپىن بەرمەك.