Arys aýdanyndaǵy «Kóksarai sý rettegishine» barǵan vedomstvo basshysy nysan bógetiniń beriktigin arttyrýǵa jáne rekonstrýktsiia jasaýǵa arnalǵan jobalyq-smetalyq qujatty tezdetip aiaqtaýdy tapsyrdy.
Aita keteiik, qazirgi ýaqytta ministrlik oblysta «Irrigatsiialyq jáne drenajdyq júielerdi jetildirýdiń ekinshi fazasy (IDJJJ-2) jobasyn júzege asyrýda. Joba oblystaǵy 62 myń gektar sýarmaly jerdiń meliorativti jaǵdaiy men sýmen qamtýdy jetildirýge múmkindik beredi.
Sonymen birge sýarý kezeńindegi sý joǵaltý kólemi 199 mln.m3-qa deiin azaiyp, jaiylymdardy sýmen qamtý 65%-dan 100%-ǵa jetedi. Joba aiasynda 12,4 myń aýyl turǵyny jumyspen qamtylady. Jalpy, IDJJJ-2 arqyly «Maqtaaral-1» birinshi jiberý kesheni, «Maqtaaral-1» ekinshi jiberý kesheni, «Arys-Túrkistan», «Qyzylqum-1», «Maqtaaral-2» irrigatsiialyq-drenajdy jelileri iske qosý josparlanǵan.
Ministr osy aýqymdy jospar aiasynda júrip jatqan Shardara, Jetisai aýdandaryndaǵy 6R-2, 5R-1, K-22-1, K-13-5, K-18 kanaldaryndaǵy qurylys jumystaryn tekserdi.
– Vegetatsiialyq kezeń jaqyndap kele jatyr. Diqandardy sýmen qamtamasyz etý – bizdiń negizgi jáne strategiialyq mindetimiz. Maýsymnyń sátti ótýi osy jumysqa tikelei bailanysty. Oblysta 300 myń gektar sýarmaly jer bar. Jumys táýlik boiy júrgizilip, sý únemdeý tehnologiiasyn qoldaný qajet. Aýyl sharýashylyǵy óndirýshileriniń ózderi de sýarmaly sýdy tiimdi, uqypty paidalanýǵa qatysty sharalardy qabyldaýy kerek, – dedi Maǵzum Myrzaǵaliev.
Sapar barysynda transshekaralyq Úlken keles magistraldy kanalynyń (BKMK), «Zah», «Hanym» magistraldary kanaldarynyń da jumysy talqylandy.
– Ózderińizge belgili, Qazaqstan jyl saiyn kórshi eldermen transshekaralyq sý resýrstaryn paidalaný boiynsha kelissózder júrgizedi. Ýaqytyly qabyldanǵan sharalar óte mańyzdy. Alaida sýmen qamtamasyz etýde sý infraqurylymy men sý sharýashylyǵy nysandarynyń ahýaly da úlken ról atqarady. Sondyqtan jóndeý jumystary sapaly, ýaqytyly júrýi kerek, – dedi ministr.
Budan bólek, Jetisai aýdanyndaǵy 1957 jyly salynǵan K-19 kanalyna avtomattyndyrý júiesiniń engizilýin de atap ótý kerek. Sebebi onda búginge deiin sý qarapaiym jolmen eseptelip keldi, sondyqtan sý shyǵynyn durys baqylaý qiynǵa soǵyp, resýrsty tiimdi paidalanylmaý jaǵdailary oryn aldy. Sýdy esepteýdiń avtomattty júiesi engizilgennen keiin bul tiimsizdikter túgel joiylady. Ári qarai osy jolmen Túrkistan oblysyndaǵy basqa da kanaldar jumysy avtomattandyrylady.
