Jambylda esekter jailaýdy jaipap tastaǵan, dep habarlaidy Dalanews.kz.
Bul týraly menshikti jýrnalist Nuradin Raqai jazdy.
"Jambyldyń esekteri jarap tur. Jurty jylap júr. Qytailyq investor esekpen aq eldi-mekenderdi jaýlap aldy. Áńkisi aqyryp, mekishi baqyryp en dalada erkin júrgen 3 myń esek jailaý bitkendi jaipap tastaǵan. Eki aýdannyń aýyldaryna aýyz salǵan. Quny 3.5 mlrd teńgeniń jobasy boiynsha sútinen dári, etinen azyq, terisinen taýar eksporttaýǵa qulyqty qytaiǵa, jergilikti bilik jer bermedik deidi. Biraq berseń qolyńnan, bermeseń jolyńnan qylǵan aý", - deidi jýrnalist.
Qazir Baizaq pen Talas aýdandarynyń birneshe aýylyn esek basyp alǵan. Óris bitken ólekse deidi jurt.
"Óitkeni jerdiń beti typ-tipyl. Munsha kólemdegi esek shabyndyqtyń shańyn, shuraily jerdiń qutyn qashyrǵan. Azaiyp jatqan esek joq. Ár aimaqtan 25-30 myńǵa esek satyp alyp, kóbeigen ústine kóbeiip jatyr. Eshkim baqpaidy. Ákeledi, basy aýǵan jaqqa jibere salady. Myńǵyrǵan esek tipti memlekettiń baqylaýyndaǵy orman alqabyn jermen jeksen etken", - deidi ol.
Sonymen óatar, Talas ózeninde ólip jatqan esek sanynyń esebi joq.
"Al ol sýmen qansha aýyl sý ishedi. Berisi, Shahan, Bostandyq, Talapty. Aiaǵy Túrkistan baryp tireledi. Ái dep jatqan ekolog joq, qoi dep jatqan vet inspektsiia joq. Bas qatyrǵan bilik joq. Osy jer bermedik dep aldai salmady ma eken degen oi keledi. Endigi jerde esek úshin eldi-mekenderdi kóshirmese tirshilik turalady deidi turǵyndar. Myna ahýalmen aýrý tarasa alapat epedemiia bolary sózsiz. Osylaisha, esekpen jaýlaý operatsiiasy ata-qonystan aiyrýǵa ainalǵan. Quty qashqan kóp kómek suraidy.
Keshe jantaq jep keldim dep em ǵoi. Jurt arqalaǵanyń qane dep jatyr", - deidi jýrnalist.
