Aqtóbe oblysynyń qylmystyq ister jónindegi mamandandyrylǵan aýdanaralyq soty dárigerdi erekshe qatygezdikpen óltirgen is boiynsha úkim shyǵardy. Sh. esimdi meditsina qyzmetkeri kináli dep tanylyp, 20 jylǵa bas bostandyǵynan aiyryldy, dep habarlaidy Dalanews.kz.
Sottyń habarlaýynsha, aiyptalýshy Sh. Qazaqstan Respýblikasynyń Qylmystyq kodeksiniń 99-baby 2-bóliginiń 8-tarmaǵy (paidakúnemdik nietpen adam óltirý) jáne 188-baby 3-bóliginiń 1-tarmaǵy (iri kólemde urlyq jasaý) boiynsha kináli dep tanylǵan.
«Qylmystar jiyntyǵy boiynsha Sh.-ǵa 20 jyl merzimge bas bostandyǵynan aiyrý jazasy taǵaiyndaldy», – dep habarlady sot.
Is qazylar alqasynyń qatysýymen qaraldy.
Qylmystyń mán-jaiy
Tergeý materialdaryna sáikes, aiyptalýshy Sh. dializ ortalyǵynda meditsina qyzmetkeri bolyp jumys istegen jáne 1956 jyly týǵan dáriger A.-ǵa telefon men bank qosymshalaryn ornatýǵa kómektesip júrgen. Ol dárigerdiń esepshottarynda iri somada aqsha bar ekenin bilgen.
Kózin emdetý úshin Astanaǵa ketken kezde dáriger páteriniń kiltin senip Sh.-ǵa qaldyrǵan. Osy sátti paidalanǵan Sh. dárigerdiń jalǵyz turatynyn bilip, ony óltirip, aqshasyn iemdený josparyn qurǵan.
«Aiyptalýshy dárigerdi páterinde kútip, oǵan asúi baltasymen ómirge qaýipti soqqylar jasaǵan. Keiin denesin tońazytqyshqa jasyryp qoiǵan», – delingen sot málimetinde.
Qylmys jasaǵannan keiin Sh. aldyn ala satyp alǵan silikon betperdeni kiip, marqum dárigerdiń esepshottarynan 5 268 000 teńge sheship alǵan. Sondai-aq onyń uialy telefondary, plansheti men noýtbýgyn urlap, barlyǵy 1 966 860 teńge materialdyq zalal keltirgen.
Osylaisha, sot aiyptalýshynyń kinási tolyq dáleldendi dep tanyp, ony uzaq merzimge bas bostandyǵynan aiyrýǵa úkim shyǵardy.
