Abai oblysynda prokýratýra «Semei ormany» filialynyń qyzmetinde zańbuzýshylyqtardy anyqtady, dep habarlaidy Dalanews.kz.
Borodýliha aýdany prokýratýrasynyń qadaǵalaý nátijesinde «Semei ormany» filialyna zań buzǵan tulǵalardyń jumysqa qabyldanǵany anyqtaldy. Atap aitqanda, buryn zańsyz aǵash kesý jáne bóten múlikti urlaý faktileri boiynsha jaýapkershilikke tartylǵan adamdar jumysqa ornalasqan. Sondai-aq júrgizýshi kýáliginen aiyrylǵan arnaiy tehnika júrgizýshisi de eńbekke qabyldanǵan.
Osylaisha, orman daiyndaýdyń zańdylyǵyn baqylaý mindeti buǵan deiin múliktik jáne ózge de qylmystar úshin sottalǵan óndiristik ýchaske sheberine júktelgen.
Budan bólek, daiyndalǵan aǵashtyń sanatyn zańsyz arzanyraq túrge ózgertý faktisi tirkelgen, bul ónim qunynyń tómendeýine alyp kelgen.
Filial basshylyǵynyń jumysyn tiisinshe uiymdastyrmaýy men áreketsizdigi saldarynan 2024 jyldyń sońyna qarai 4 myń tekshe metrden astam daiyndalǵan aǵash iske asyrylmai, 80 mln teńgeden astam qarjy joǵaltylǵan. Bul qarajat kásiporynnyń 75 mln teńge kólemindegi salyq bereshegin tolyq óteýge múmkindik berer edi.
Aýdan prokýratýrasynyń qadaǵalaý aktisiniń negizinde atalǵan qyzmetkerlermen eńbek sharttary buzyldy. Daiyndalǵan aǵashty ótkizý jáne salyq bereshegin óteý boiynsha sharalar qabyldandy. Filial direktory qatań sógis túrindegi tártiptik jaýapkershilikke tartylyp, keiin qyzmetinen bosatyldy.
Borodýliha aýdany prokýratýrasy orman zańnamasynyń jáne erekshe qorǵalatyn tabiǵi aýmaqtar týraly zańnamanyń saqtalýyn erekshe baqylaýda ustaidy.
Eske salaiyq, buǵan deiin «Semei ormany» filialynyń basshysy órtti sóndirýdegi salǵyrttyq úshin jaýapqa tartylǵan bolatyn.
