Jiynǵa «Atameken» QR Ulttyq kásipkerler palatasynyń basqarma tóraǵasynyń 1-shi orynbasary Maqsat Qiqymov, QR Parlamenti Májilisiniń depýtaty Qainar Abasov jáne óńirlik keńes músheleri, aýdandyq kásipkerler keńesi músheleri, Túrkistan oblysy máslihatynyń depýtattary, memlekettik organdarmen qarjy institýt basshylary jáne kásipkerler qatysty. Óńir basshysy Túrkistan oblysynda shaǵyn kásipkerliktiń áleýeti joǵary ekenine toqtaldy.
– Túrkistan oblysynda halyq sany kóbeiip keledi. Ol – qýanyshty jaǵdai. Endi sol elge qajetti jumys oryndaryn, óndiris oryndaryn kóbeitý – ýaqyt talaby. Túrkistan óńiriniń turǵyndary qashan da kásipkerlikke beiim bolǵan. Kásipkerlik sýbektileri sany jóninen oblysymyz Almaty men Nur-Sultan qalasynan keiin úshinshi orynda tur.
Kásipkerler sany jyldyń ózinde 10 myńǵa ósip, 155 myńǵa jetti. Sondyqtan biz kásipkerlikke úlken mańyz berip, «Qarapaiym zattar ekonomikasy» men «Biznestiń jol kartasy – 2025» baǵdarlamasy arqyly qoldaý kórsetip otyrmyz. Túrkistandaǵy qurylystardy da jergiliki kásipkerler atqaryp jatyr. Kásipker bolý – óte qiyn. Ol úshin ekonomika, zań, býhgalteriiadan bilim bolýy kerek. Uiymdastyrýshylyq sheberligi joǵary jáne táýekelge bara alatyn azamattar ǵana myqty kásipker bola alady, – dedi Ómirzaq Shókeev.
Kezdesýdiń kún tártibinde kolledjderdi senimgerlik basqarýǵa berý, Túrkistan indýstriialyq aimaǵynda ornalasqan kásiporyndardyń problemalyq máseleleri, Túrkistan qalasynda qolónershiler ortalyǵyn ashý jáne ózge de máseleler talqylandy. Jeńildetilgen nesie, sýbsidiia túitkilderi de tarqatyldy. Kásipkerler erkin formatta kókeide júrgen suraqtaryn qoiyp, ol usynystar hattamaǵa engizildi.
Osy kúni Túrkistanda «Kásipkerlik qyrandary» jobasynyń III kezeńi ótti. Biznesti bizneske qoldaý kórsetýge shaqyratyn mańyzdy is-sharaǵa oblys ákimi Ómirzaq Shókeev pen kásipkerler, mentorlar, joba avtorlary qatysty. Óńir basshysy bul jobanyń kásipkerge bereri kóp ekenin aityp, qatysýshylarǵa sáttilik tiledi.
– Búgin sizdermen qaita qaýyshyp, «Kásipkerlik Qyrandary» jobasynyń kezekti maýsymyn ótkizgeli otyrmyz. Jobanyń ereksheligi – «Kásipkerlik Qyrandary» arqyly iri biznes ókilderi kapitaly joq, biraq biznes ideiasy bar, kásipkerlikke jańa qadam basqan azamattarǵa qoldaý kórsetedi.
Árine kásipkerlerdi qoldaý Memleket basshysynyń, Úkimettiń udaiy nazarynda turǵan másele. Biznesti qoldaýǵa baǵyttalǵan keń kólemdegi baǵdarlamalar osynyń dáleli. «Qarapaiym zattar ekonomikasy», «Biznestiń jol kartasy 2025» baǵdarlamalary oblys kásipkerlerimen jaqsy qoldanylýda.
«Qarapaiym zattar ekonomikasy» arqyly kásipkerler 47 mlrd teńgege jeńildetilgen 6%-ben nesielengen bolsa, «Biznestiń jol kartasy 2025» arqyly jyl sońyna deiin 40 mlrd teńgege nesieleý kútilýde. Jańadan biznesti bastaý, jobany qarjylandyrýda jobanyń mańyzy zor. Sondyqtan izbasar býynǵa jasap jatqan qoldaýlar úlken qurmetke laiyq.
«Kásipkerlik Qyrandary» jobasy birinshi kezekte startap jobalar úshin qajetti qarjylai qoldaý bolsa, ekenshi kezekte qarjy salymyn jasaǵan mentorlar úshinde investitsiia kózi dep aitýǵa bolady. Iaǵni, eki jaqqa da utymdy investitsiia. «Kásipkerlik Qyrandary» jobasyna qoldaý kórsetken mentorlarǵa alǵysymdy aitqym keledi. Sizder óńirdiń áleýmettik-ekonomikalyq damýyna úles qosyp jatyrsyzdar, — dedi ol.
Jobanyń osy kezeńine «Atameken» UKP basqarma tóraǵasynyń birinshi orynbasary Maqsat Qiqymov pen QR Parlamenti Májilisiniń depýtaty Qainar Abasov ta qatysty.
Aita keteiik, «Kásipkerlik qyrandary» – biregei joba. Ol Túrkistan oblysynda shaǵyn biznesti qoldaý úshin iske qosylǵan. Jobany Túrkistan oblysy kásipkerler palatasy men oblys ákimdigi júzege asyryp otyr. Maqsaty – óńirdegi iri, orta kásipkerler mikrobiznesti, startaperlerdi qoldaidy. «Bastaý Biznes» túlekterine investitsiia sala otyryp, qarjylaý qoldaý kórsetedi, mentor bolady. Mentor jobany súiemeldeidi.
«Kásipkerlik Qyrandary» jobasynyń úshinshi kezeńinde 7 joba usynylyp, talqylandy. Olar: Meditsinalyq qaldyqtardy joiatyn tseh; Jarqyraǵan tratýarlyq jol plitkalaryn shyǵaratyn tseh; «Tarmaqtar» kitaby; Qoldan uryqtandyrý jáne veterinarlyq stantsiia; Ǵaryshtyq bailanys jáne spýtniktik robototehnika kesheni; «Eco-Protect» dóńgelekterdi qaita óńdeý jobasy jáne múmkindigi shekteýli jandarǵa qajetti ámbebap monsha salý bastamasy usynyldy.
