Búgin qala ákimi Rashıd Aıýpovtyń qatysýymen kópqabatty turǵyn úılerdiń gaz taratý shkaftaryn gazben toltyrý jumystary iske qosyldy.
Endi ár páter turǵyndary "KazTransGaz Aımaq" AQ "Kentaý Gaz Sharýashylyǵyna" baryp derbes shot ashý arqyly úılerin gazǵa qosa alady.
– Gazdy qubyrlaryn jasaǵan merdiger jeke-jeke qosady. Ol úshin ár páter turǵyndary úıde bolyp, gazǵa qajetti pesh daıyn bolýy qajet. Mamandar ábden tekserip, qosýǵa daıyn degen kezde kezeń-kezeńimen páterlerdi qosamyz – dedi Túrkistan oblysy boıynsha "KazTransGaz Aımaq" AQ fılıalynyń dırektory Erjan Balabekov.
Qazirgi tańda Kentaý qalasy tabıǵı gazben qamtylyp, qala aýmaǵynda tutynýshy sanyn kóbeıtý jumystary júrgizilýde, «KazTransGaz Aımaq» AQ-na 2063 abonent tutynýshy tehnıkalyq shart alý úshin ótinish bergen. Qalada 200-den asa abonent gazben qamtylǵan.
– Óte qýanyshtymyz. Úıimizdiń mańaıyna gaz keldi. Qala basshylaryna rahmet! Aıtqan ýádelerin oryndady. Endi qujattarymyzdy daıyndasaq, úıimizge gaz qosylady. Jolymyz da salyndy, – deıdi Sh.Ýálıhanov kóshesiniń turǵyny Orynkúl Joldybaı.
Jalpy qalany tabıǵı gazben qamtýdyń İİ kezeńi nysanynda qysymmen tekserý jumystary júrgizilýde. Ony bıyl tamyz aıynyń sońynda aıaqtaý josparlanǵan.
