Ol bul týraly feisbýktegi paraqshasynda jariialady, dep habarlaidy Dalanews.kz.
Jazýshy keiingi ýaqytta densaýlyǵynyń nasharlaǵany jaily jii jazyp júr. Onyń aitýynsha, úsh ai saiyn em alyp júrgen aýrýhanasy ózin tirkeýden shyǵaryp tastaǵan.
«Asqazany joq aǵzamnyń qabyldaǵan taǵamdy jartylai ǵana qorytyp, qajetti vitaminderdi jetkize almai, qanymdy suiyltyp, aǵarta bastaǵanda, aýrýhanaǵa úsh aida bir jatyp, qyzyl túiirshikterdi biraz jinap qaitýshy edim. Tirkeýden shyǵaryp tastaǵannan beri sol qan aǵarýynan seskengen úreiimdi kóbirek jazyp ketip, úmitimdi úzgizbei, jigerimdi jasytpai qadaǵalap otyratyn Shákem ol jaqqa ketkeli úrgedek ýaiymǵa salynyp, sizderdi de shoshytyp alǵanymdy sezinip otyrmyn. Tamyzdyń onynan aýrýhanaǵa jatyp-shyǵyp, qudai qalasa, quldyrańdap oralam ǵoi», – dep jazdy ol.
Sondai-aq ol otbasy jaily da sóz qozǵaǵan.
«Qudaiǵa shúkir eki ul, bir qyz, tórt nemerem bar. Bári ýniversitet támamdaǵan mamandyq ieleri. Qyzym ýniversitetten soń Kimepte aǵylshynsha oqyp, sonda aǵylshyn tilinde sabaq ta bergen.
Keiinde eki ministrlikte qyzmet istep júrgen ul, qyzymdy Kárim Másimov bir-aq kúnde jumystan shyǵaryp jibergen- edi. Oǵan sebep – meniń «Q.Másimovtyń Qytai men Reseidiń joǵyn joqtap, qazaq múddesin aiaqqa taptap otyr» degen maqalamnyń jaryq kórýi edi.
Úsh balam da memlekettik qyzmetke mańailatpaǵan soń, aýlaqtanyp qalyp, tiip-qashty sharýamen kún kórip júr.
Barselonadan oqý bitirip kelgen nemeremdi qyzmetke alýyn surap elbasyǵa hat ta jazǵam. Nazarbaevtyń «tapsyrýymen» qala ákimi bolǵan Baýyrjan Baibek myrza nemereme Ulttyq Saraidyń aýla sypyrýshysynyń (dvornik) ailyǵy 35 myń orynbasarynyń «laýazymyn» usynyp, mazaqtaǵandai tóbemnen basyp, tómen tuqyrtqan.
Iá, bul meniń otbasymnyń ózgelerden ozbaǵan da, qalmaǵan da kúii ǵana», – dep jazdy qalamger.
Onyń sózinshe, tirkeýge QR eńbek sińirgen qairatkeri degen ataǵy jaramaidy. Tirketýge keregi – Memlekettik syilyqtyń laýreaty. Nemese jazýshyda Qazaqstannyń Eńbek Eri ataǵy bolýy tiis.
