Respýblıkalyq «Taza Qazaqstan» ekoaksıasynyń «Kıeli meken» aptalyǵy Taldyqorǵandaǵy İlıas Jansúgirovtyń eskertkishinen bastaý aldy, dep habarlaıdy Dalanews.kz.
Elimiz boıynsha júrip jatqan kóktemgi ekologıalyq bastamaǵa İ.Jansúgirov atyndaǵy Jetisý ýnıversıtetiniń stýdentteri qazaq poezıasynda óz orny bar aqynnyń óleńin oqýmen kiristi. Aldymen qalamgerdiń kópshilikke belgili jyryn oqyǵan bilimgerler ıgilikti sharany eskertkish turǵan aýmaqty tazalaýmen jalǵastyrdy.
Aqyn eskertkishi turǵan skver beker tańdalmapty. Sebebi, Jetisý jerin jyrǵa qosyp, tumsa tabıǵatty sózben sýrettegen aqyn, dramatýrg, prozashy, feletonshy, satırık, jýrnalıs jáne aýdarmashy Jansúgirovtiń bıyl týǵanyna 130 jyl tolyp otyr eken.
Bul týraly «İ.Jansúgirov atyndaǵy Jetisý ýnıversıteti» komersıalyq emes aksıonerlik qoǵamynyń basqarma múshesi – jastar isi jónindegi prorektor Bolat Serıev:
– Qazaqstan Respýblıkasynyń Prezıdenti Qasym-Jomart Toqaev elimizdiń árbir óńirindegi tumsa tabıǵatty kózdiń qarashyǵyndaı saqtaý kerektigin udaıy aıtyp keledi. Soǵan oraı baǵdarlamalyq qujattar daıyndap, júıeli jumys júrgizý kerektigin tapsyrdy. Sol arqyly óskeleń urpaqtyń boıyndaǵy otanshyldyq rýhty oıatyp, patrıottyq sezimin ushtaý kerektigin jetkizdi, – dep máseleniń mánisin túsindirip ótti.
Memleket basshysy júktegen mindet qalalar men aýyldardy, aýlalar men baqshalardy, kósheler men kire beristerdi ózimiz tazartýymyz kerektigin uǵyndyrady. Sondyqtan Jetisý jurtshylyǵy tabıǵattyń tazalyǵyn aldyńǵy orynda ustaıdy.
