Stýdent otriadtaryna suranys bar ma?
Saiasattanýshy Edýard Poletaevtyń aitýynsha Keńes úkimeti kezindegi stýdent otriadtary 15 mln-ǵa tarta jastyń basyn qosqan.
«Jastar aýylsharýashylyǵy, qurylys salasyna atsalysty. Halyqqa kómek qolyn sozdy. Biylǵy jyl elimizde «Jastar jyly» bolyp bekitildi. Elbasymyz stýdenttik otriadtardyń kieli Túrkistandy kórkeitýge de úles qosaryna senim bildirip otyr. Menińshe stýdent otriadtary týraly ideiany qaita qolǵa alý qajet» dedi ol.
«Jastar KZ» qorynyń jetekshisi Baqyt Jańabaevtyń pikirinshe elimizde osydan birshama ýaqyt buryn «Jasyl el» jastar otriady qurylǵan. Alaida júieli dami almady.
«Stýdenttik otriadtardy qurý jastardy qoǵamdyq-saiasi ómirge aralastyrýdyń bir tetigi. Ony ótkenmen bailanystyrmai jańa Qazaqstannyń kelbeti negizinde, ózimizshe qurýymyz kerek», – dedi ol.
Óz kezeginde ǵalym Iýrii Bulyqtaev: «Qazaqstanda dál sondai otriadtar qurylar bolsa, jumylyp, asarlatýdy qajet etetin salalarǵa qarai baǵyttaý qajet» degen pikir aitty.
«Strategiia» áleýmettik jáne saiasi zertteýler ortalyǵynyń jetekshisi Gúlmira Ileýovanyń pikirinshe báz-baiaǵydai stýdenttik otriadtardy «tiriltý» múmkin emes.
«Sábet úkimetindegi ekonomikanyń qurylymy bólek edi. Qazirgi jastarǵa motivatsiia qajet. Olardyń talpynysyn turaqty jalaqy tólep oiata alamyz. Budan bólek olarǵa ómirlik tájiribe kerek.
Menińshe mundai bastamaǵa sonymen birge iri kásiporyndar, korporatsiialar qyzyǵýshylyq tanytýy kerek. Bálkim, stýdenttik otriadtardyń arasynan olardyń talap-údesinen shyǵatyn talanttar tabylyp qalar», – degen pikir bildirdi ol.
