Atyraý oblysynyń qurylys, sáýlet jáne qala qurylysy basqarmasy basshysynyń orynbasary, 33 jastaǵy Talǵat Bisendi UQK qyzmetkerleri ustady, dep habarlaidy Dalanews.kz «Aq Jaiyqqa» silteme jasap.
Basylymnyń málimetinshe, sheneýnik aldyńǵy kúni Qurmanǵazy aýdanyndaǵy issapardan oralǵan. Artynsha ol tikelei oblystyq ákimdik ǵimaratynda qolǵa tústi.
Basylym derekkózderine súienip, sheneýnik merdiger kompaniia basshysynan para aldy degen kúdikke ilingenin habarlady.
"Sheneýnikke qatysty QR QK-niń 367-baby («Para alý») boiynsha qylmystyq is qozǵaldy. Al aqsha bergen JShS jetekshisi QR QK-niń 366-baby («Para berý») boiynsha tergelýde. Sondai-aq merdiger kompaniianyń keńsesinde jáne oblystyq ákimdik ǵimaratynda tintý júrgizildi", – delingen habarlamada.
Tergeý barysy
«Aq Jaiyqtyń» habarlaýynsha, ázirge Talǵat Bisen qolhatpen bosatylǵan. Alaida tergeý organdary onyń bultartpaý sharasyn ózgertip, ýaqytsha qamaý izoliatoryna jabý máselesin qarastyrýdy josparlap otyr.
Qazir tergeý amaldary jalǵasýda.
