Memleket basshysy Bas prokýror Berik Asylovty qabyldady,- dep habarlaidy Dalanews.kz.
Prezidentke eldegi zań ústemdiginiń jai-kúii men prokýratýra qyzmetiniń negizgi baǵyttary boiynsha jumys nátijeleri baiandaldy.
Qasym-Jomart Toqaevqa arnaiy prokýrorlardyń qoǵamda rezonans týdyrǵan jáne memleket múddesine, sondai-aq azaptaýǵa qatysty asa mańyzdy qylmystyq isterdi tergep-tekserý barysy jóninde esep berildi.
Biyl arnaiy prokýrorlar sotqa 55 qylmystyq is joldap, sonyń negizinde 112 adam sottalǵan. Taǵy 80 is sottardyń qaraýynda jatyr. Arnaiy prokýrorlar teksergen ister boiynsha jalpy somasy 14,4 milliard teńge zalal óteldi.
Budan bólek, Memleket basshysyna qylmystyq jolmen tapqan kiristerdi izdestirýdiń jańa tásilderi men ony el ekonomikasyna paidalanýdyń perspektivasy jóninde málimet usynyldy. Qozǵalǵan qylmystyq ister boiynsha jalpy quny 105 milliard teńge bolatyn múlikke tyiym salyndy. Sonyń ishinde prokýrorlar basqa da quqyq qorǵaý organdarymen birge tek esirtkige qarsy ister boiynsha 12 milliard teńgege jýyq aktivterdi qolǵa túsirgen.
Bas prokýror Berik Asylov aktivterdi qaitarý máselesi týraly da aitty. Eki jyl ishinde prokýratýra organdary arqyly 850 milliard teńgeniń aktivteri qaitaryldy. Bul qarajat óńirlerde 400-ge jýyq áleýmettik jáne kommýnaldyq nysan salýǵa jumsalady. Búginde 60 ǵimarattyń qurylysy aiaqtalǵan.
Prezidenttiń Qazaqstan halqyna Joldaýyn júzege asyrý maqsatynda jáne biznesti belsendi qoldaý úshin Bas prokýratýraǵa qarasty vedomstvonyń ataýy ózgermek. Jańa format investitsiiaǵa ońtaily jaǵdai jasap, kásipkerler men investorlardyń quqyǵyn qorǵaýǵa múmkindik beredi.
Qasym-Jomart Toqaev barlyq salada zańdylyqty qamtamasyz etý jáne qoǵamda «Zań men tártip» qaǵidatyn nyǵaitý jumystaryn jalǵastyrýdy tapsyrdy. Sonymen qatar quqyq qorǵaý jáne memlekettik organdardyń alaiaqtyqqa, esirtki saýdasyna, turmystyq zorlyq-zombylyqqa, vandalizmge qarsy is-qimylyn, biznesti negizsiz qylmystyq qýdalaýǵa jol bermeý jumystaryn tiimdi úilestirý mańyzdy ekenin atap ótti.
